Изградбата на објекти кај градскиот парк може да се сопре привремено, смета пензионираниот адвокат Ѓорѓи Митрев, поддржувајќи ја Иницијативата за спас на паркот, која деновиве е актуелна во Кавадарци.
Според него, потребно е да се отпочне постапка за проверка на законитоста на приватизацијата на земјиштето. Важно е, вели, како е приватизирано земјиштето во претходниот период.
– Се сомневам дека тоа е сторено незаконски. Доколку се утврди дека приватизацијата на земјиштето е незаконска, ете можност за поништување на постапката за издавање одобрение за градба. Не треба да се откажуваме од протестот и иницијативата за стопирање на криминалните активности, нагласува Митрев.
Како што појаснија градоначалникот на Кавадарци Митко Јанчев и од Секторот за урбанизам при општината, работите на терен се согласно генералниот урбанистички план од 2003 и деталниот од 2013 година. Според нив, нема завлегување во градскиот парк, кој е еден од најубавите во Македонија.
извор: МИА
