Индонезиските власти соопштија дека започнале истрага против Фејсбук во врска со нарушување на приватноста на корисниците на таа социјална мрежа во Индонезија, додавајќи дека доколку биде прогласена за виновна, на претставниците на Фејсбук во земјата им се заканува до 12 години зтвор и парична казна од 871.000 долари.
Индонезиското Министерство за комуникации и информациски технологии денеска соопшти дека побарало од Националната полиција да ги истражи евентуалните кршења на законот за лични податоци, еден ден откако Фејсбук објави дека е можно повеќе од еден милион жители на таа држава да биле „жртви“ на неовластеното делување на фирмата за консултантски услуги во политика „Кембриџ аналитика“.
Министерството синоќа ги повика на разговор претставниците на Фејсбук во Индонезија и побара од нив социјалната мрежа да ги прекине апликациите кои и овозможуваат на трета страна да добие приватни податоци од корисниците.
Индонезија е четврта држава во светот по бројот на корисници на Фејсбук, каде активни профили имаат 115 милиони жители или 97 отсто граѓани кои имаат мобилни телефони.
Извор: МИА
