Денешниот ден го одбележаа настани посветени на 9 мај, денот на победата над фашизмот и Денот на Европа. Но, за жал, денеска е и ден на трауматичното сеќавање на граѓанките и граѓаните на Куманово и на цела Македонија. Тоа е ден кога започна 48-часовната војна во кумановско Диво Насеље, жесток судир со вооружена криминално-терористичка група. Во пресметките загинаа осум припадници на полицијата.
Во пресрет на одблежувањето на тригодишнината од „малата војна“ во Диво Насеље, Куманово, на 9 мај 2015 година, ЦИВИЛ -Центар за слобода организира панел -дискусија утре во Комитет, Куманово, со почеток во 13 часот. Учесниците на настанот ќе обидат да дадат одговор на овие и на многу други прашања поврзани со настаните и судските процеси за Диво Насеље.
До денешен ден, овој настан го следат недоречености и мистерии околу прашањата кои се однесуваат на организаторите и мотивите за овој тежок безбедносен предизвик за земјата. Имајќи предвид дека од денешна перспектива ништо од ова не е решено, може да се заклучи дека иако ја сменивме насоката, далеку сме од прифаќање на европските вредности кои денеска ги славиме.
Од останатите настани повторно во центарот на вниманието се судските рочишта во Кривичниот суд. Денеска на репертоарот се случаите Поткуп и Титаник.
Премиерот Зоран Заев по денешното рочиште за случајот Поткуп во Кривичниот суд на кое се гледаше скратената снимка што беше објавена на Јутјуб, рече дека Судот констатира оти на три пати снимката се прекинува. Тој истакна дека му е мило што целиот процес преку доказната постапка бил разобличен, како во делот на испрашувањето на сведокот така и во делот на неговото испрашување како обвинето лице.
Во случајот Титаник, и денеска како и на вчерашното рочиште за Тенк, одбраната побара изземање на Специјалната Јавна обвинителка Катица Јанева. Образложението е легитимно исто онолку колку што е и комично…
Нормираниот учинок повеќе нема да биде услов за исплата на минималната плата. Од Сојузот на синдикати на Македонија денеска соопштија дека Уставниот суд ги укинал членовите од законот во делот за нормираниот учинок. Со ова, според ССМ, ќе се овозможи правна сигурност во примената на Законот за минимална плата и исплатата на минималната плата за сите работници во државата.
Еден затвореник е тешко повреден во тепачка што се случила вчера во затворениот дел на Казнено поправната установа – Идризово.
Маја Ивановска
