Поттикнати од секојдневните одлуки на ВМРО-ДПМНЕ во име на државните и народните интереси, вклучително и по прашање за спорот со името и можните решенија, Демократската фракција на ВМРО-ДПМНЕ излезе со соопштение во кое се обвинува опозицијата за дефокусирање на јавноста со контрапродуктивни прес-конференции.
„Недозволиво е, па макар тоа било и под диригентска палка на наметнат лидер, ВМРО ДПМНЕ и понатаму да се обезличува и да биде во служба и заштита на обвинетите партиски криминални структури наместо во служба и заштита на државните и национални интереси. Партијата не смее и понатаму да се става во улога на заложник за нечиј спас, за да на крајот членството и сите граѓани ги платат сите нивни цехови и гревови“, се вели во соопштението.
Повикувајќи се на приоритетите што треба да бидат, а не се, на ВМРО-ДПМНЕ, фракцијата бара итно да се преземат мерки што ќе ја вратат партијата на прав пат, а не да биде, со вакво раководство, мета на потсмев од коалиционите партнери и некредибилен европски партнер.
„ВМРО ДПМНЕ не смее и понатаму да глуми фиктивна опозиција и да се занимава со тривијални работи. Водење на недоследна партиска политика, распната помеѓу реалноста и фикцијата, безидејноста и импровизацијата, и немањето капацитет и храброст да се биде самостоен наспроти внатрешниот и надворешниот притисок, се причини кои и во иднина ќе ја дообезличуваат и руинираат партијата. Потребно е итно да се изградат и промовираат конкретни препознатливи ставови, принципи, идеологија и политика во интерес на државата и нацијата и за најкратко можно време со ново и демократско избрано раководство од членството, партијата да се врати како победник на политичката сцена“, е заклучокот на Демократската фракција на ВМРО-ДПМНЕ.
МЛ
