Народниот театар од Охрид в недела, 3 јуни, премиерно ќе ја одигра претставата „Стаклена менажерија“, во режија на Софија Ристевска Петрушева.
Режисерката Ристевска, која на македонската јавност и е позната по својот алтернативен режисерски ракопис, вели дека тоа е претстава за комплексите, несигурноста и суровоста на современиот човек, кој сосема ја загубил солидарноста и сочувството кон послабиот. Во ова време на либерален капитализам, хуманоста полека исчезнува.
„Стаклена менажерија“, работена по текст на Тенеси Вилијамс, е емоционално патување низ комплексноста на семејните односи. Претставата е болен крик за големата неспособност на човекот да љуби.
Во претставата улогите ги толкуваат Никола Тодороски, Стрезо Стаматовски, Адријана Билаловиќ Тодороска и Филип Кипровски.
Инаку, токму „Стаклена менажерија“ е првата театарска претстава на програмата на годиншното 58 издание на „Охридско лето“ Нејзината фестивалска изведба е закажана за 13 јули, на вториот фестивалски ден. (МИА)
