Новинарката Ивона Талевска која беше осудена на две години условна затворска казна за затајување данок, во предметот „Тифани“ на СЈО, е назначена за нова претседателка на Македонската асоцијација на новинари. Таа најави дека ќе се залага за стандарди во новинарството, правна и социјална заштита.
Талевска доаѓа на местото на претседателката Слаѓана Димишкова, којашто подолг период веќе не е на таа позиција, бидејќи си даде отказ, додека позицијата на Драган Павловиќ Латас како генерален секретар, го зазема Александар Михаилов, од порталот весник.мк. Во потпретседателските позиции на МАН е реизбран Цветин Чилиманов, а нов член е Ѓеорги Какашевски.
Талевска е избрана за претседател на МАН со само 22 гласа, иако на официjалнта страна пишува: Македонската асоцијација на новинари е најголема и најзначајна асоцијација на професионални новинари во Македонија, која е основана во 2002 година. Најголема и најзначајна?
Инаку во статутот на МАН стои дека – Претседателот ја претставува и застапува Асоцијацијата дома, и во странство, во правниот и финансиски промет. Во негово отсуство подолго од 7 дена, или по овластување, во тоа го менува Генералниот секретар.
Новите членови ветија дека ќе се залагаат за независно и професионално новинарство, за воведување минимална плата кај новинарите и медиумските работници, како и за дополнително осигурување за репортерите, новинарите и снимателите.
Единствено новинарот Љупчо Златев му остана „верен до смрт“ на Латас кој смета дека тој најдобро раководеше со МАН.
Дали МАН ќе успее да прерасне во вистинско здружение кое ќе ги застапува интересите на медиумските работници…?
Инаку, иако пред само пет месеци призна вина, новинарката Ивона Талевска, пред неколку дена во Апелациониот суд, негираше дека е виновна за милионското даночно затајување.
„Јас и ден денеска не чувствувам вина, но поради медиумската хајка, која што трае повеќе од една година, сметав дека признание на вина е најдобро решение. И пред пресудата, јас веќе бев осудена поради јавните и медиумските притисоци, но и од социјалните мрежи. Не сум задоволна со условната казна. Јас сум осудена и со условна казна“, изјави Талевска.
Д. Муратов
