„Омразата на навивачите групи не е од вчера, таа, за жал, постои подолго време. Јас како спортист сум имун на такви навредливи скандирања и сум против тоа, бидејќи спортските арени се направени за нешто друго, за нешто убаво, за уживање…“, вели македонската фудбалска легенда, Дарко Панчев во разговор за ЦИВИЛ Медиа.
Во контекст на сè поизразената омраза од страна на навивачките групи со Панчев разговаравме за насилствата на трибините и надвор од нив, за непријатностите и проблемите за време на натпреварите, национализмот и говорот на омраза. Панчев е дециден дека на трибините и терените нема место за ваквите појави. Тој додава дека со одредени членови на навивачките групи би требало да се занимаваат социолози, да разговараат со нив и да им се објасни дека ваквите работи не носат ништо добро.
„Се случуваат и полоши инциденти, некои страдаат, некои завршуваат во затвор…, на крај сите се во загуба и би било добро да нема такви работи во иднина“, потенцира тој.
Панчев е дециден дека етничката припадност не е секогаш причина за инциденти и нетрпеливост.
„Еве ќе ја земам пример Србија, таму инцидентите меѓу навивачите на Црвена Ѕвезда и Партизан се толку чести што нема врска со етничкото потекло, и во Хрватска меѓу навивачите на Динамо и Хајдук… Кај нас најголема меѓуклупска нетрпеливост има(ше) помеѓу навивачите на Вардар и Пелистер, или меѓу Слога и Шкендија… Мора да се посвети повеќе внимание во јавноста за овие инциденти и да се прават емисии, да се разговара за тоа, за да дојдеме до целта, а тоа е дека инцидентите и омразата не носат ништо добро“, вели тој.
Пораката на македонската фудбалска легенда до навивачите е да доаѓаат на стадион пред сè да го бодрат својот клуб, и дека треба да го изразуваат своето незадоволство ако нема добра игра, нема добри резултати, меѓутоа незадоволството да го изразат до управата на клубот или играчите.
„Секаде има меѓуклупски скандирања и провоцирања, меѓутоа не смее тоа да оди во домен до меѓуетнички пароли и омраза, бидејќи стадионите се за нешто убаво“, вели Панчев.
Панчев истакна дека ниту еден играч не сака да слуша навредливи скандирања кон другиот клуб или друга етничка заедница, бидејќи така не се мотивира да игра, додавајќи дека нема поубаво нешто од тоа играчот да го слушне своето име скандирано од илјадници навивачи, се разбира ако одиграл добар натпревар.
„Спортистите се мотивираат ако навиваат за нив, и јас сум бил играч и ништо не ми значело ако мојата навивачка група навива нешто против другите навивачи, ама кога цел стадион ќе грмне ‘напред Вардар’, и тоа како ми даваше мотивација“.
Разговорот со Пачев е дел од проектот проектот „Патриотизам – ДА, национализам – НЕ!“ чија цел е да придонесе кон зајакнување на соживотот, подобрување на односите со соседите и кон забрзување на евро-атлантските инегративни процеси на Македонија. Проектот е поддржан од програмата Цивика Мобилитас.
Ангела Петровска
Обработка на текст и камера: Дехран Муратов
Монтажа: Маја Ивановска
Текстот е дел од проектот „Патриотизам ДА, национализам НЕ!“ што го спроведува ЦИВИЛ со поддршка од Цивика мобилитас. Содржината на овој текст е единствена одговорност на ЦИВИЛ и на ниту еден начин не може да се смета дека ги одразува гледиштата на Цивика мобилитас, Швајцарската агенција за развој и соработка (SDC) или организациите што ја спроведуваат.
Услови за користење, авторски права и заштита на приватноста
Преземање на содржините под различни услови од наведените не е дозволено, освен со писмена дозвола од ЦИВИЛ. Повредата на авторските права е забранета со закон.