ЦИВИЛ Медиа разговараше со граѓанките и граѓаните од Тетово и Гостивар на тема каква Македонија сакаат. Поголемиот дел од одговорите на граѓанките и граѓаните се совпаѓаат, и сите сакаат да ја видат Македонија во подобро светло.
„Демократска и независна. Да се променат законите, да се зголемат платите, и да биде како во Европа“, вели еден граѓанин од Тетово.
„Македонија, исправна Македонија. Македонија да биде за сите, да биде богата земја, каде што сите ќе бидат задоволни, без разлика на националности“.
„Заедничка. Сите сме во Македонија, сите живееме заедно“, „Само мирна да биде, да нема војна“, се дел од пораките на граѓанките и граѓаните.
Некои од одговорите се негативни, и покажуваат дека граѓаните не се задоволни од состојбата во Македонија.
„Никаква. Си ја сакам старата Македонија, оваа што е, не Северна“, вели еден граѓанин.
„Сакаме Русија да дојде овде да владее со нашава држава. Само тоа го сакаме. Руската федерација и Евроазиската Унија се иднината на Македонија . Тоа е спасот за Македонија“, вели еден граѓанин од Тетово.
Граѓанките и граѓаните сакаат подобра иднина и за политичката и за економската состојба на Македонија.
„Оваа Македонија не ја сакаме, за ништо не чини, знаете и вие зошто. Мали пензии, сè е скапо, друго немам што да ви кажам“, вели граѓанка од Гостивар.
„Сакам Македонија да биде на албански и на македонски“, вели еден пензионер.
„Ова не се прашува во парк, прашајте на друго место. Одете сега.“
„Ја сакам Македонија со високи перспективи, економијата ни е многу слаба, работниците имаат многу мали плати, што значи дека на младите им требаат плати за да можат да дотраат до крајот на месецот. Со вакви плати тоа не може да се постигне. Младите ни одат во туѓина, се одалечуваат од своето место и тоа не е добро. На Македонија и требаат млади, и требаат работници, и требаат фабрики во кои што ќе може да се работи и да се заработи како во другите држави. Јас работам во Италија и знам како е“, вели граѓанин од Гостивар
„Ние сакаме европска Македонија, да бидеме подобри, инаку вака не чини“, „Македонија каква што е. Европска Македонија. Да има работа за младите, јас сум веќе пензионер, за мене поминало“, додаваат граѓаните на Гостивар.
„Добро да биде, да одиме во НАТО, друго што може да биде? Овде е голема сиромаштија, нема ништо овде. Ни работа, ни ништо нема. Цела младина побегна. Друго нема што“.
Анкетата е дел од проектот „Акција – Интеграција“ којшто ЦИВИЛ го спроведува во партнерство со Фондацијата Хајнрих Бел од Германија, посветен на промоција на европските и зелените вредности, демократските вредности и антинационализмот.
новинарки: Маја Ивановска и Диана Тахири
обработка на текст: Ангела Петровска
камера: Биљана Јордановска
