По синоќешната трагична автобуска несреќа на автопатот Скопје – Тетово загинаа 14 патници, а многу од преживеаните се борат за својот живот.
На вечерашната вонредна владина седница, одлучено е 14 и 15 февруари да бидат прогласени за ден на жалост.
„Ова е тешка ноќ, полна со неизмерна болка и тага. Сочувствуваме со семејствата на загинатите. Ние ги мобилизиравме сите сили и капацитети за да им помогнеме на повредените. Интервенциите беа брзи и од страна на полицијата и од страна на болниците, како на државните така и приватните“, изјави премиерот Зоран Заев.
Тој рече дека причините за несреќата се уште се непознати, а истрагата е под раководство на надлежен јавен обвинител.
Засега, познато е дека автобусот со 51 патник од Скопје тргнал во 16.15 часот, а со него најчесто патувале јавни службеници и студенти од Гостивар. Тој, според досегашните информации, поминал на спротивната коловозна лента, влегол на регионалниот пат и паднал во удолнината. На лице место починале седум луѓе.
Во Градската болница „8 Септември“ примени биле 37 лица, од кои 6 починале. Во „Св. Наум Охридски“ починало 1 лице, а на Клиничкиот центар примени се 7 лица, од кои 3 се со сериозни повреди. На Ургентниот центар е примена и една 28-годишна бремена жена, која е во добра здравствена состојба.
Возачот на автобусот е хоспитализиран во Градската болница, со него веќе разговарала полицијата и тој, како што информираше министерот за здравство Венко Филипче, е во добра здравствена состојба.
Телата на починатите патници се предадени на обдукција во Институтот за судска медицина, а дел од нив се уште не се идентификувани.
Доцна синоќа пред Градската болница „8 Септември“ беа читани имињата на преживеаните патници, додека нивните семејства и роднини чекаа во неизвесност со надеж дека ќе го слушнат имињата на нивните блиски на листата преживеани.
Во текот на денешниот ден се очекуваат повеќе информации за повредените патници и за причините за трагичната автобуска несреќа во близина на Карпалак.
На денешната седница на Советот на Општина Гостивар, се очекува да де донесе одлука за прогласување на тридневна жалост во знак на почит кон загинатите.
М. И.
