ЦИВИЛ МЕДИА | 21 ноември 2026
Украина денеска, 21 ноември, го одбележува Денот на достоинството и слободата, посветен на храброста на украинските граѓанки и граѓани кои во два историски моменти се спротивставија на авторитаризмот и застанаа во одбрана на демократијата, човековите права и европската иднина на својата земја.
По тој повод, ЦИВИЛ – Центар за слобода, во соработка со Амбасадата на Украина во Северна Македонија, на 23 ноември организира посебен настан под наслов „УКРАИНА: СИЛНА И СЛОБОДНА“, со пораката „СЛОБОДА. ДОСТОИНСТВО. СОЛИДАРНОСТ.“
Настанот ќе опфати обраќања на претставници на украинската амбасада, граѓанското општество и украинската заедница, како и тематска фотографска изложба и презентација на хуманитарна иницијатива за поддршка на украинскиот народ.
Два историски моменти, една борба за слобода
Денот на достоинството и слободата е воспоставен со претседателски указ во 2014 година, во чест на два пресвртни историски настани: Портокаловата револуција во 2004 година и Револуцијата на достоинството, позната како Евромајдан, која започна на 21 ноември 2013 година.
Портокаловата револуција беше масовно демократско движење против изборните фалсификати и политичките злоупотреби. Девет години подоцна, одлуката на тогашната украинска власт да го запре процесот на приближување кон Европската Унија предизвика нов бран граѓански протести на плоштадот Мајдан во Кијив.
Протестите прераснаа во историска борба за достоинство, демократија и право на слободен избор. Насилното задушување на протестите однесе повеќе од сто животи, а загинатите останаа запаметени како Хероите на Небесната стотка.
Денес, историското значење на овој датум е уште посилно. Украинскиот народ ја продолжува борбата за слобода и независност, соочен со бруталната руска агресија, уништувањето на цивилната инфраструктура и огромните човечки страдања.
Од Мајдан до денешната борба за слобода
Фотографската изложба што ќе биде претставена на настанот во организација на ЦИВИЛ ќе ја поврзе историската Револуција на достоинството со современата украинска борба за опстанок, слобода и независност.
Посебно место ќе имаат човечките стории за храброста, жртвувањето, истрајноста и враќањето на украинските воени заробеници.
На настанот ќе биде претставена и хуманитарна иницијатива за помош на Украина, како потсетување дека солидарноста не завршува со зборови, туку бара конкретни дела.
Слободна и силна Украина е неразделен дел од визијата за мирна, демократска и безбедна Европа. Одбраната на човечкото достоинство, слободата и правото на самоопределување останува заедничка одговорност на демократските општества.
ЦИВИЛ – Центар за слобода, Глобална иницијатива за одбрана на демократијата и Вестминстерска алијанса за Украина им го честитаат Денот на достоинството и слободата на сите Украинки и Украинци, како и на сите слободољубиви луѓе во светот кои ја поддржуваат борбата на Украина за слобода.
ЦИВИЛ – Центар за слобода
Глобална иницијатива за одбрана на демократијата
Вестминстерска алијанса за Украина












