Финансии

Министерството за финансии денеска на конференција, пред претставници на Европската комисија, ОЕЦД и СИГМА, беше презентирана „Политиката за внатрешната финансиска контрола во јавниот сектор“, односно стратегијата за идниот развој на јавната внатрешна финансиска контрола. Од Европската комисија истакнаа дека сме прва земја во регионот која изработила ваква стратегија.

Министерот за финансии Драган Тевдовски  посочи дека јавната внатрешна финансиска контрола е дел од идните преговори со ЕУ. Тоа поглавје, според искуството на некои од земјите од регионот, е меѓу посложените во однос на усогласување со меѓународните стандарди и најдобрите практики на ЕУ. Меѓутоа, истакна Тевдовски, нашата земја досега има спроведено неколку твининг проекти за јавната внатрешна финансиска контрола, така што тој очекува дека подготвено ќе ги дочекаме преговорите.

Од Европската комисија посочија дека реформите ќе обезбедат потранспарентно и отчетно носење на одлуки.

Судења

Гордана Јанкуловска поранешната министерка за внатрешни работи,  доби 4 наместо 6 години затворска казна за случајот „Тенк“ одлучи Апелацискиот суд во Скопје.

„Апелациониот суд Скопје известува дека, постапувајќи по кривичниот предмет во јавноста познат како „Тенк“ , по одржана јавна седница, донесе пресуда со која жалбите на обвинетата Г. Ј. од С., делумно ги уважи на начин што ја преиначи првостепената пресуда во делот на одлуката за казната и обвинетата ја  осуди на казна затвор во траење од четири години. Апелациониот суд Скопје во останатиот дел првостепената пресуда во целост ја потврди“ се вели во сооопштението на судот.

Собрание

Денеска во Собранието беа закажани пратенички прашања, а премиерот Зоран Заев се сретна и со лидерите на албанската опозиција, Зијадин Села од Алијансата на Албанците и Билал Касами од Беса, на којашто  изразиле поддршка за опстојување на СЈО како посебен орган во рамки на Јавното обвинителство кое ќе има ефикасни надлежности.

Средбата доаѓа во период кога власта е во потрага по 80 пратенички гласа за да се донесе новиот Закон за јавно обвинителство со кој се решава и судбината на СЈО.

ЦИВИЛ – активности

Хроника 

„Претседателот на Собранието, Талат Џафери, уште сега најави дека се сомнева во злоупотреби за време на изборната камапања. Поточно неговата изјава дека во овој период пратениците се наклонети кон злоупотреби па затоа нема да закаже собраниска седница за време на претседателската кампања дури и да се договорат партиите за СЈО. Што се однесува до Џафери, СЈО може да чека и до 6 мај.“, се вели во предизборната хроника  на ЦИВИЛ Медиа  – „Во немилост на изборите“, меѓу другите активности и информации за претседателските избори.

Панел дискусија: Со аргументи и вистина против говорот на омраза

На панел дискусијата „Со аргументи и вистина против говорот на омраза“, во организација на ЦИВИЛ – Центар за слобода, се зборуваше за говорот на омраза и црната кампања, пред почетокот на официјалната кампања за изборите.

Како медиумите влијаат на ширењето на говорот на омраза, но и влијанието на социјалните мрежи, неказнивоста и заспаноста на институциите беа само дел од темите на којшто разговараа Дехран Муратов од ЦИВИЛ во улога на модератор на дискусијата, новинарката Кристина Озимец, активистката Мерсиха Смаиловиќ и комуникологот Сефер Тахири.

Д. Тахири