На панел дискусијата „Со аргументи и вистина против говорот на омраза“, во организација на ЦИВИЛ – Центар за слобода, се зборуваше за говорот на омраза и црната кампања, пред почетокот на официјалната кампања за изборите.
Како медиумите влијаат на ширењето на говорот на омраза, но и влијанието на социјалните мрежи, неказнивоста и заспаноста на институциите беа само дел од темите на кои разговараа Дехран Муратов од ЦИВИЛ во улога на модератор на дискусијата, новинарката Кристина Озимец, активистката Мерсиха Смаиловиќ и комуникологот Сефер Тахири.
„Како што се наближуваат изборите, расте и говорот на омраза, а со тоа и црната кампања“, истакна Муратов.
Новинарката Кристина Озимец, се осврна на социјалните мрежи и нивното влијание врз јавноста, поврзувајќи ги говорот на омраза и црната кампања со лажните вести, кои земаат се поголем замав.
„Социјалните мрежи колку што може да бидат корисни и да отворат идеи за иновативни и нови пристапи во работата, особено кога станува збор за новинарството, истовремено можат да бидат страшна платформа за линч, клевети и закани. Тие се една палета на непроверени информации и клевети, коишто потоа создаваат атмосфера на линч“, вели Озимец.
Таа зборуваше и за сајбер булингот на социјалните мрежи, каде како особено ранлива категорија ги лоцира жените новинарки.
Активистката Мерсиха Смаиловиќ зборуваше од позиција на личност која во јавноста го разоткри говорот на омраза на социјалните мрежи, од вработена припадничка на безбедносните сили во земјата. Говор кој се однесува на неодамнешниот терористички напад во Нов Зеланд, каде животот го загубија 50 муслимански верници за време на петочната молитва.
„Тоа што се случи во Нов Зеланд е злосторство од омраза. Ние мора да сфатиме дека говорот на омраза никогаш не запира само и исклучиво на говор, туку прераснува токму во повисоки форми, како што е злосторство од омраза и екстремизам. Ние како граѓани сме уморни постојано да ловиме кој како пишува. Ако немаме сериозни законски регулативи и сериозни институции кои решително ќе се борат против ваквите појави, ништо не правиме“, истакна Смаиловиќ.
Таа вели дека досега многупати ги пријавувала овие случаи, како и случаи поврзани со закани кон неа до институциите, но, за жал, досега не е покрената ниту една постапка.
Комуникологот Сефер Тахири, зборуваше за состојбата во медиумите во однос на ширењето на говорот на омраза и црната кампања, како и за одговорноста на новинарите и медиумските работници.
„Спречувањето или ограничувањето на говорот на омраза, односно контролата или само-контролата на медиумите или актерите вклучени во медиумската продукција не значи спротивставување на слободата на изразување, бидејќи како што вели една изрека ‘нема слобода за непријателите на слободата’. Токму тие коишто шират говор на омраза често се повикуваат на слободата, а всушност тие ја прекршуваат токму слободата на изразувањето“, истакна Тахири наведувајќи повеќе примери од медиумското секојдневие.
М. Ивановска