На само два дена пред почетокот на изборниот молк, на руската социјална мрежа ВКонта́кте од анонимен профил, именуван како Илија Громовник се објавени прислушувани телефонски разговори на функционери од власта и личности кои се поврзуваат како блиски до неа, но и на личности од опозицијата како поранешната министерка за внатрешни работи, Гордана Јанкуловска.
На Фејсбук, пак, постојат повеќе профили со истото име, што пропагираат бојкот на претстојните претседателски избори.
Уште поинтересен е фактот што објавените разговори најпрво се споделени од Фејсбук страницата на Трета политика поврзан со Љупчо Палевски.
За сега, од Министерството за внатрешни работи и Специјалното јавно обвинителство нема повеќе информации освен дека се изненадени од објавените разговори. СЈО, во изјава за ТВ 24 гарантираат дека од кај нив нема протечено ниту еден материјал и најавија проверка на тоа дали ги поседуваат овие разговори.
Според содржината на објавените разговори станува збор за досега необјавен материјал.
На повидок е скандал поврзан со прислушуваните разговори кои се дел од долгите преговори меѓу власта и опозицијата. Имено, во овој период беше актуелен обидот на опозицијата, преку преговори со власта, да ги минимизира улогата и ингеренциите на СЈО, а прислушуваните разговори да ги маргинализира како докази во судските постапки против поранешни високи владини функционери, вклучувајќи го и поранешниот премиер Груевски. Впрочем, сега власта преговара со партијата што го организираше масовното прислушување и спроведуваше криминална власт, за судбината на СЈО кое токму нив ги гони.
Во време кога СЈО и правдата што се очекува од неговата работа се на удар, објавувањето на овие прислушувани разговори преку руска социјална мрежа, прво споделена од радикалите на Трета политика, претставува скандал и ироничен потсетник дека оние што предизвикале една политичка криза не можат да бидат дел од решението на таа криза.
ЦИВИЛ Тим за комуникации
