Една мала рекапитулација и потсетување пред вториот круг од претседателските избори.
Слушам, многу мала била излезноста за избор на претседател, партиите биле казнети (од различни причини), граѓаните кажале што мислат, драстично е сменета сликата од локалните избори…
Прво, претседателските избори никогаш не се атрактивни како парламентарните или локалните избори и секогаш има фактичка помала излезност (што не се гледа единствено кога се полнат кутиите). Функцијата претседател е фактички поапстрактна за граѓаните од аспект на нивните потреби и интереси, а во нашата држава веќе подолго време е потполно обезвреднета и обесмислена. Заради ова е многу проблематично постоењето цензус за избор на претседател.
Второ, процентот на излезност не може вистински да биде утврден бидејќи, фактички, не знаеме колку граѓани живеат во Република Северна Македонија. Непостоењето попис со кој барем приближно би се утврдила оваа бројка ги прави потполно бесмислени изјавите за излезноста. Процентите се валидни само доколку се дел од калкулации во кои се оперира со вистински бројки. Во случајот на Република Северна Македонија, едноставно, сѐ се сведува на нагаѓање. Еве моето нагаѓање е дека моментално во Република Северна Македонија нема повеќе од 1.500.000 жители.
Трето, луѓето кои гласаат свесно се ставаат во заблуда за што гласаат. Наместо да се бира личност која најмногу соодветствува за извршување на функцијата претседател, дефинирана во Уставот, се гласа за поголеми пензии, вработување, субвенции за земјоделците, здравство… (што дефинитивно нема врска ниту со кандидатите, ниту со функцијата претседател на државата). На ваков начин, не само што се води популистичка кампања која ги лаже луѓето, туку се подгреваат и очекувања Претседателот на државата да задоволи одредени потреби и интереси кои ни формално, ни фактички не може да ги задоволи.
Четврто, целокупната кампања поврзана со претседателските избори беше поврзана со политичките партии. Попартиска кампања на претседателски кандидати кои се нарекуваат непартијци до сега не сме имале. Тоа значи дека граѓаните излегуваа или не излегуваа да гласаат за или против политичките партии, нивните програми, нивните активности. Самите претседателски кандидати (освен смешната страна на купот гафови и глупости кои имавме можност да ги видиме и чуеме) беа, во голема мера, споредни и помалку важни.
Според мое мислење, доколку сакаме и понатаму да имаме систем во кој претседателот има значајна улога на коректив во државата и функција која значи, условно речено, мешање и во законодавната и во извршната и во судската власт, мора и изборниот процес да го прилагодиме на оваа функција. Во спротивно, функцијата претседател станува бесмислена и потполно излишна, односно, Претседателот станува само уште една марионета на владејачката партиска структура.
Преземање на содржините e ЗАБРАНЕТО (!!!), освен со писмена дозвола од ЦИВИЛ и тоа исклучиво според Условите за користење, авторски права и заштита на приватноста.
Повредата на авторските права е забранета со закон.
Врз основа на договор за соработка, оваа содржина е достапна за Плусинфо и Слободен печат без ограничувања.
