Недостиг на ресурси, отсуство на какви било инвестиции во изминатата деценија, недостиг на теренски возила, несоодветна кадровска екипираност! Ова е сликата за Дирекцијата за заштита и спасување во моментот. Според новото раководство, освен што се скенира состојбата, паралелно се подготвува функционална анализа за оваа државна институција, која што треба, повторно да стане столбот на цивилната заштита во општеството.
„Дирекцијата е всушност, наследник на поранешната Цивилна заштита, што функционираше во рамките на МО и Инспекцијата за заштита од пожари во МВР, а од 2005 година функционира како самостоен орган на државната управа. Но, власта на ВМРО-ДПМНЕ изминатата деценија се погрижила, да ѝ се одземат ингеренциите, да се ослабат целосно потенцијалите на Дирекцијата, така што е оневозможено да биде подготвена и превентивно и последично да интервенира секогаш кога има потреба од цивилна заштита. Дирекцијата со негрижата на претходната власт, во моментов е целосно руинира, иако е значаен дел од безбедносните структури, врз кои државата треба да се потпре во сите ситуации која граѓаните се соочуваат со елементарни непогоди, пожари, поплави, земјотреси, “вели директорот Аднан Џафероски.
Имајќи ја во вид целокупната состојба на институцијата, заложбите на Џафероски се преку процес на континуирани инвестиции, да се овозможи набавка на уште еден „Ер трактор“ двосед (авион за гаснење пожари, којшто ќе генерира и нови кадри за летање, нови пилоти), покрај постоечките 3 ер-трактори и на еден хеликоптер. Како што вели, неопходни се и повеќе теренски возила, зашто оние кои што се во моментов на располагање се крајно амортизирани.
„Па, со години овде ставката на капитални инвестиции била ‘нула’. Ресурсите со кои што располага Дирекцијата биле донации од меѓународната заедница, власта едноставно не водела грижа. Набавките во опрема се неопходни, за да се обезбеди оптимален минимум за работа, а со тоа да се обезбеди функционалност и ефикасност на Дирекцијата. Со паралелното постоење на Дирекцијата и Центарот за управување со кризи, само се ослабени двете институции и одземени ингеренциите. За квалитетна цивилна заштита, неопходно е здружување на нивните сили, ресурси, потенцијали“, оценува Џафероски.
Тој најавува дека ќе ги вложи сите напори, оваа институција да ги зајакне постоечките капацитети, да ги зголеми ресурсити, за да се овозможи брза и ефикасна интервенција во сите кризни ситуации со кои ќе се соочат граѓаните и државата, воопшто.
Моника Талеска
