Со поднесување оставка на функцијата претседател на Алтернатива по се изгледа дека за Африм Гаши се трасира патот да стане претседател на Собранието.
Од неговата партија Алтернатива вчера преку соопштение истакнаа дека на последната седница на Централното собрание одржана во четврток на 23 мај, меѓу другото, беше разгледана и кандидатурата на Африм Гаши за претседател на Собранието на Република Северна Македонија.
„Со оглед членот 67 од Уставот предвидува дека Претседателот на републичкото Собрание не може да биде и претседател или функционер на политичка партија, Африм Гаши поднесе оставка од функцијата претседател на Алтернатива и од сите други функции во партијата“, велат од Алтернатива.
Пред почетокот на денешната конститутивна седница на Собранието, претседателот на ВМРО-ДПМНЕ Христијан Мицкоски, изјави дека очекува предлогот Африм Гаши да биде претседател на Собранието да биде поддржан од сите што се потпишани за тој да биде прв човек на законодавниот дом.
„Очекувам од сите оние кои што се потпишаа позади поддршката за Африм Гаши да биде претседател на Собранието“, рече Мицкоски.
И претседателот на ЗНАМ – За Наша Македонија, Максим Димитриевски, кој доби пратенички мандат, но исто така е и градоначалник на Куманово изјави дека петмината пратеници од неговата партија ќе гласаат за Африм Гаши, доколку тој биде предложен за претседател на Собранието.
Димитриевски му посака успех на новиот собраниски состав.
Европски фронт го поставува прашањето на легимитетот
Од друга стана Елми Азири од Европскиот фронт не кажа дали ќе гласаат за предлогот Африм Гашји да биде претседател на Собранието. Азири рече дека се уште нема одлука како ќе постапат како коалиција.
„Верувам дека бројките на мнозинството се уште не се на виделина, а доколку се случи она што се шпекулира во јавноста дека ќе има коалиција меѓу ВМРО и ВЛЕН верувам дека ќе се соочиме со проблемот на длабока криза на легитимитетот и тогаш се поставува прашањето што да се прави со легитимитетот што го добивме од граѓаните, затоа сметам дека треба добро да ги процениме работите пред да донесеме одлуки. Тоа што го кажав претходно, сите ние пратениците на Европскиот фронт сега ќе се сретнеме и ќе разговараме за сите нови моменти на политичката сцена“, рече меѓу другото Елми Азири од Европскиот фронт.
Апасиев: Левица нема да поддржи Албанец да биде претседател на Собранието
Пратениците на Левица нема да го поддржат Африм Гаши од Алтернатива да биде претседател на Собранието. Лидерот на партијата Димитар Апасиев пред почетокот на конститутивната седница изјави дека тие не би дале поддршка Албанец да биде претседател на Собранието.
На прашање зошто не сакаат Албанец да биде претседател на Собранието, Апасиев рече дека е противуставно да се зборува на друг јазик освен на македонски кога се заседава со седници.
Апасиев рече дека очекува „косовизација“ на државата, и му понуди на Мицкоски, како што кажа, бланко поддршка за тоа да не се случи.
– Очекувањата се за косоваризација на државата како што си ги гласавте, тоа се очекувањата. Ние би дале поддршка од нашите шест да не биде албанец претседател на Собранието. Отворено го повикуваме Мицкоски, бланко поддршка на невидено само да не биде косоваризиран повторно македонскиот парламент, рече Апасиев.
Во Собранието денеска почна конститутивната седница на новиот собраниски состав. Со седницата претседава најстарата пратеничка Мерита Колчи Коџаџику. Конститутивната седница, според новиот Деловник, трае најмногу три дена, а Собранието е конституирано со изборот на претседател на Собранието
Н. Абдурахмани
