Алкалоид: Ќе се надмине можниот застој во доставата на средствата за дезинфекција до аптеките, цврсто остануваме на одлуката да не ги зголемиме цените

Компанијата „Алкалоид АД Скопје“ соопшти дека во моментов работи со максимална искористеност на своите производни капацитети и човечки ресурси кои им се на располагање и направиле реорганизација на сите процеси со цел да ги задоволиме барањата на македонскиот пазар за лекови, дезинфициенси, медицински алкохол, антисептици и останати средства со антибактериско дејство.

Во моментов, посочуваат од компанијата, заради големата побарувачка на дел од горе наведените производи и предизвиците со кои се соочуваме при набавка и транспорт на суровини и амбалажа од увоз, можно е да се јави застој во некој сегмент, но во никој случај нема да се дозволи прекин во снабдувањето на кој било од споменатите производи.

Согласно вонредните услови на функционирање во „Алкалоид АД Скопје“ и покрај отсуство на преку 150 наши вработени кои се ослободени од работа заради тоа што припаѓаат на ризичните групи, приоритет во снабдувањето со средства за дезинфекција и хигиена даде на болниците, здравствените домови и институциите кои функционираат во кризни услови. Доставата до веледрогериите (аптеките) и дистрибутерите (ланците маркети) можно е во овој период да се одвива со мал застој, но тоа е првенствено заради неумерените набавки од страна на домаќинствата и очекуваме дека наскоро тоа ќе се надмине, наведуваат од компанијата.

Водени од начелата за корпоративна општествена одговрност, како и хуманата програмско-производна определба насочена пред сѐ кон крајните корисници „Алкалоид АД Скопје“, нагласуваат, цврсто ќе остане на одлуката да не ги зголеми цените на ниту еден производ од било кој сегмент на своето производство независно од зголемувањето на цените на влезните суровини, логистичките и ресурсните предизвици со кои се соочуваме.

Излезните цени на нашите производи, особено на лековите, дезинфициенсите, медицинскиот алкохол, антисептиците и останатите средства со антибактериско дејство се дистрибуираат согласно ценовниците кои важат од 1 февруари и ќе останат исти. Љубезно апелираме до целата јавност да се следат и најодговорно да се почитуваат препораките на Министерството за здравство преку нивните официјални канали на комуникација http://zdravstvo.gov.mk/korona-virus/ со цел да не се креира непотребна паника. Во оваа прилика, би сакале да упатиме голема благодарност и желби за добро здравје на сите здравствени работници во земјава и на сите македонски граѓани, затоа што здравјето е пред се, додаваат од компанијата.

извор: МИА