пишува: САШО ОРДАНОСКИ
Во периодот кога „човечкиот капитал“ е во центарот на политичката преокупација на власта, некаква фудбалска навивачка група од Чаир прославувала некаков јубилеј, при што, во навивачкиот занес на кој потклекнале, нанела штета врз скапиот ентериерен кичерај на МНТ.
Побизарна вест одамна не сме чуле.
Која будала смислила (а потоа некој тоа им го дозволил!) дека каква било прослава на фудбалски навивачи – во Македонија, тој „човечки капитал“ од спортскиот полусвет, во принцип, е составен од неколку дузини насилници и празноглави провокатори кои главно се користат како „мускули“ за фудбалски, партиски или пара-полициски операции од најдолен вид – треба да се одвива в театар?! Па, ако веќе одбележуваат навивачки фудбалски јубилеи, не ли им е најпригодно да направат некаков турнир или натпревар во фудбал каде, на отворено и на свеж воздух, малку ќе навиваат, малку ќе навредуваат по разни компетитивни основи, ќе се поднапијат, а на крај и уредно ќе се степаат, може и меѓу себе, како што тоа обично го прават во ресорот на своето хулиганско организирање?!
„Одговорност! Одговорност! Заев е виновен!“, извикува на бината, во вториот чин од оваа старогрчка трагедија, античкиот хор под ужаснати маски од македонски етно-националисти, облечени во сукњичките на Александар Велики, бидејќи навивачиве вандали да ти биле Албанци кои повеќе духовно, од материјално, симболично им го осквернавиле „кинескиот ресторан со театарска бина“ излепен со гипсени позлати и црвен плиш, што ни остана во наследство како национална театарска институција по нивното антиквизаторско владеење.
Ах, каде заминаа оние златни политички години на меѓуетнички тепачки на скопското Кале, пресметките во Бутел и Топаана кај крстот и орелот, а и крвавите конфликти по скопските автобуси! Каде се оние прекрасни подмолни соопштенија на Светскиот македонски конгрес, каде се заносните скандирања „УЧК! УЧК!“, па и по некое државно знаме да се запали…
Ништо. Сега мораат по театри да се гнетат, напикани како шејтани во џамија и ѓаволи во црква, да висат од балконите на ложите, небаре запишале постдипломски студии за изучување театарско фенг-шуи. Ебате тај-чи-навивачите, не се обиделе ни објектот да го запалат…
Јас би им ја одземал лиценцата за навивање. Па, што ако се на ДУИ и на Артан Груби – законот на џунглата мора да важи за сите подеднакво! Нема насилство, нема мир!
Ваквата негативна појава и бурните реакции на неа е малку и резултат на премногу академската атмосфера во земјава, каде мнозинството анемични политички расправии се за даночни стапки, за правни реформи, за буџетот на државата… Како, ви се молам, ќе се оди на избори со овие теми?! Еве, ќе се усвои и буџет за купување изборни гласови, ама нема, белки, да гласаме за споредбени статистички показатели и евро-атлантски интегративни процеси! Боже пази!
Дајте, додека е време, да си фатиме ние некоја меѓунационална тема за гуслање – па, може и некоја навивачка контра-прослава да се смисли, малку да се направи штета и на спротивставениот табор. И после да си гласаме врз таа основа, како што тоа успешно го правевме дваесетина години наназад…
Преземање на содржините e ЗАБРАНЕТО (!!!), освен со писмена дозвола од ЦИВИЛ и тоа исклучиво според Условите за користење, авторски права и заштита на приватноста. Повредата на авторските права е забранета со закон.
Со преземање на било која содржина објавена на ЦИВИЛ Медиа, спротивно на Условите, се согласувате на ЦИВИЛ да му исплатите надоместок од 60.000 денари во рок од осум дена по преземањето на содржината. Оваа обврска не застарува, а за секое доцнење на исплатата ќе биде пресметана соодветна законска камата.
ПРЕЗЕМАЊЕТО (и делумното) НА КОЛУМНИТЕ Е ЗАБРАНЕТО ЗА СИТЕ ПРЕД 15 ЧАСОТ НА ДЕНОТ НА НИВНОТО ОБЈАВУВАЊЕ. Врз основа на посебен договор за соработка и размена, ниедно ограничување не важи за Слободен печат. Овие правила важат за сите, без оглед на тоа од каде е преземена содржината што оригинално е објавена на медиумкста платформа на ЦИВИЛ.
