Дехран Муратов
Длабоко во сите нас, датумот 27 април од пред две години, колку и да не сакаме, сепак нѐ потсетува на едно крваво сценарио кое, за среќа, заврши неуспешно и без жртви.
Кандидатот за претседател поддржан од ВМРО-ДПМНЕ, Гордана Силјановска Давкова во текот на посетата во Кавадарци каде имаше средби со граѓаните, порача дека граѓаните врз кои се вршело притисок, ќе бидат похрабри и ќе излезат во вториот круг и ќе ги разрешат сите дилеми.
„Оние кои мислеа дека не вреди да се излезе на овие избори, охрабрувачки е, ги гледате дебатите и не би сакала да ги коментирам. Јасен е резултатот, мислам дека сме на прав пат и дека на 5-ти мај ќе има основ да се слави, и не зошто за прв пат жена победила во Македонија на претседателски избори, туку затоа што јас верувам дека треба да се вреднува знаењето, умот, одговорноста, блискоста до граѓаните, скромноста, ако сакате, и дека тоа е демократската добитна комбинација“, истакна таа.
Професорката по право, чиј слоган е „Правда за Македонија“, во ниту еден случај не го осуди насилството во Собрание од пред две години. Тогаш, се поставува прашањето за каква „правда“ се залага „независната“ кандидатка за претседател, Силјановска Давкова? Вели дека „на 5-ти мај ќе има основ да се слави“, а што ќе се слави? Тоа што пред неколку години на 5-ти мај специјалците ги тепаа граѓан(к)и пред Влада, на улица, па дури и студенти во библиотека… Етеб за нас обичните граѓан(к)и, и 5-ти мај, како и 27 април има друго значење и „славје“.
И претседателскиот кандидат на владејачката коалиција на СДСМ, Стево Пендаровски им забележа на ВМРО-ДПМНЕ и на претседателската кандидатка на опизициската партија Гордана Силјановска Давкова дека не го осудиле упадот во Собранието од пред две години.
„Пред две години на овој ден имавме една од најгрдите епизоди воопшто во историјата на модерна Република Македонија. Тој ден беше организиран упад во највисокиот законодавен дом во кој тогашната партија на власт се обиде да го спречи мирниот трансфер на власта. Страдаа пратеници, новинари, вработени во Собрание, дел од луѓето кои упаднаа добија судски пресуди, за дел од нив се водат судски постапки, но во овој изборен контекст не чувме осуда од партијата што тогаш тоа го организираше, ВМРО-ДПМНЕ и нејзиниот кандидат за претседател Гордана Силјановска ниту тогаш, ниту во изминатите две години, по кој било повод не кажа ниту еден збор осуда за тој чин што ја посрамоти Македонија и ја нареди во кругот на земји каде такви случаи се практикуваат во недостиг на базичен мир и безбедност за граѓаните“, рече Пендаровски.
Пендаровски вели: „Дел од луѓето кои упаднаа во Собрание добија судски пресуди, за дел од нив се водат судски постапки“… и толку, завршува со насилниците и се префрлува на ВМРО-ДПМНЕ и Силјановска.
Ете јас ќе ја продолжам изречената „казна“ за насилниците кои упаднаа во Собранието на 27 април, дел од нив се амнестирани, дел од нив добија тендери, дел од нив се на подолг престој во странство (Будимпешата), дел од нив…
Премиерот и лидер на СДСМ, Зоран Заев, го повтори ставот дека, доколку на вториот круг од претседателските избори не биде постигнат потребниот цензус или не победи кандидатот на власта, Стево Пендаровски, ќе бидат распишани предвремени парламентарни избори.
„Застанавме зад независен претседателски кандидат кој очекуваме дека ќе го устоличиме во иден претседател на Република Северна Македонија. Јас верувам во тоа и тоа е моја желба, посветеност и очекување за иднината на државата. Секако, за тоа на крајот одлучуваат граѓаните и ако тие одлучат поинаку ќе проектираме термин за предвремени парламентарни избори“, рече Заев.
И лидерот на ВМРО-ДПМНЕ, Христијан Мицковски постојано најавува дека на предвремени парламентарни избори ќе победи неговата партија, откако на овие претседателски избори ќе победи Силјановска Давкова.
Ова ти е исто како изреката „Рибата уште не е фатена, а тие веќе го ставија тавчето“.
Преземање на содржините e ЗАБРАНЕТО (!!!), освен со писмена дозвола од ЦИВИЛ и тоа исклучиво според Условите за користење, авторски права и заштита на приватноста.
Повредата на авторските права е забранета со закон.
Врз основа на договор за соработка, оваа содржина е достапна за Плусинфо и Слободен печат без ограничувања.
