Претседателот на Центарот за управување со кризи (ЦУК), Стојанче Ангелов најави дека во моментов се работи на воспоставување и имплементација на повикувачки европски број за помош 112. Ангелов посочи дека на овој број граѓаните ќе ја добијат помошта што им е потребна во моментот, односно пријава на физички напади, сообраќајни несреќи, пожари и медицинска помош.
– Помошта што граѓаните денес ја бараат на броевите 192, 193 и 194 ќе биде концентрирана во еден број, тоа е бројот 112 како што е во цела Европска Унија. Од страна на Унијата донирани се околу еден милион евра за набавка на средства и опрема и обука на лицата кои ќе работат на овој број, изјави Ангелов.
Тој додаде дека државата досега има обезбедено просторни услови и работат на селекција на луѓе кои ќе работат на овој број, односно приматели на повиците на линијата 112.
Ангелов најави дека процесот е во тек и се очекува бројот да биде во функција во текот на јуни оваа година. Во однос на сегашните броеви за прва помош, Ангелов истакна дека тие нема да бидат укинати веднаш и во прва фаза, според нивна проценка, броевите ќе бидат активни околу една до две години.
Претседателот на ЦУК објасни дека новата линија за повик на помош ќе работи така што кога граѓанинот ќе побара помош, дежурниот оператор на бројот 112 ќе го пренасочи повикот таму каде што треба. Ангелов истакна дека не станува збор за механичко препраќање на повикот, односно операторот ќе се погрижи соодветната потребна помош да пристигне таму каде што е повикана.
