Австралија воведе санкции против белорускиот претседател Александер Лукашенко, поради поддршка за руската инвазија врз Украина. Ова се наведува во денешното соопштение на австралиското Министерство за надворешни работи, јави Си-Ен-Ен, пренесува МИА.
Новите санкции вклучуваат 22 „руски пропагандисти и оперативци за дезинформација“, а меѓу санкционираните се и уредници од медиумите Раша тудеј (Russia Today), Фондацијата за стратешка култура (Strategic Culture Foundation), ИнфоРос (InfoRos), ЊузФронт (NewsFront), пишува во соопштението.
На листата со санкции се најдоа и сопругата на Лукашенко, Галина, како и неговиот син Виктор, кој претходно имаше високи улоги за национална безбедност во Владата.
Според соопштението, санкциите се за „Русија и оние кои ја поддржуваат нејзината незаконска, неиспровоцирана инвазија на демократскиот сосед, да платат висока цена“.
Од Министерството додаваат дека „ќе продолжат со воведување дополнителни санкции, за да нанесат значителни трошоци, за тие во Русија и Белорусија, кои носат одговорност или држат лостови на моќ“
Јапонија ќе го замрзне имотот на уште 25 руски државјани и ќе го забрани извозот во 81 руска организација, објави јапонското Министерство за финансии.
Со ова, вкупниот број санкционирани Руси се искачи на 101 лице.
Меѓу новите 25 санкционирани се и Игор Шувалов, поранешен заменик на рускиот премиер и претседател на голема државна банка, како и пет братучеди на олигархот Сергеј Чемезов.
