Нацрт одлуката на американскиот Врховен суд за абортусот, што протече во јавноста месецов, може да значи дека, судот, по него, ќе се сврти и кон истополовите бракови, правото на контрацепција и на другите права, изјави претседателот на САД, Џо Бајден, во текот на вчерашниот ден, јавија странски медиуми, пренесува МИА.
– Запомнете ги моите зборови: тие ќе тргнат (…) и на одлуката на Врховниот суд за правото на истополови бракови, нагласи Бајден на собир на донатори во Чикаго, додавајќи дека и контрацепцијата, исто така, ќе се најде на удар.
– Таквите одлуки ќе бидат достапни за сите и ќе предизвикат дополнителни поделби во Соединетите Американски Држави. Ќе се расправаме за работи околу што не би требало да има расправии, истакна Бајден.
Откако протече нацртот од мнозинското мислење на судскиот совет, што сугерира оти Врховниот суд наскоро може да ја поништи пресудата на „Ро против Вејд“ од 1973 година, со што е легализиран абортусот, Бајден излезе со апел. Американскиот претседател апелираше гласачите да го заштитат правото на абортус, така што на изборите во ноември, ќе гласаат за кандидати, кои го поддржуваат тоа.
Американскиот Сенат не го усвои предлог законот со кој правото на абортус, заштитено со пресуда на Врховниот суд во случајот „Роу против Вејд“, ќе го претвори во федерален закон.
Републиканците го блокираа гласањето на законот со „филибастеринг“, односно право на неограничена дебата, што јасно ги покажа партиските поделби што постојат во врска со историската судска одлука и ограничувањата на законодавната гранка на власта, пренесе Гласот на Америка. .
Тоа беше обид да се зачува речиси 50-годишната судска одлука со која се прогласува уставното право на абортус, што сега е во сериозна опасност да биде поништено во Врховниот суд од страна на конзервативното мнозинство.
Пред гласањето, неколку десетици демократи од Претставничкиот дом, главно жени, маршираа од Претставничкиот дом до Сенатот, извикувајќи: „Моето тело, моја одлука“.
Тие потоа влегоа во салата на Сенатот и мирно седеа на местата за публика додека сенаторите дебатираа за правото на абортус.
Во септември минатата година, Претставничкиот дом гласаше со 218 „за“ и 211 „за“ за да се усвои нацрт-законот за правото на абортус речиси идентичен со законот за Сенатот.
Американскиот претседател Џо Бајден го повика Конгресот да донесе закон со кој би се заштитиле услугите за абортус за милиони Американки. Меѓутоа, тесното мнозинство на неговата партија не беше доволно за да се надмине републиканскиот филибастеринг (правило кое бара мнозинство во Сенатот од 60 гласови за да се заврши дебатата за повеќето прашања и да се премине на гласање).
Републиканците со децении работат на именување конзервативни судии во Врховниот суд и поништување на пресудата на „Роу против Вејд“,потсетува Гласот на Америка.
Сите 50 републиканци гласаа за блокирање на гласањето за законот, а ним им се придружи и еден демократ, сенаторот Џо Менчин.
Конгресот со години се бори со политиките за абортус, но вчерашното гласање за нацрт-законот усвоен од Претставничкиот дом доби нова итност откако нацрт-мислењето на Врховниот суд покажа дека мнозинството судии сакаат да ја поништат пресудата „Роу против Вејд“, з акоја многумина милсат дека претставува закон сам по себе.
Врховниот суд својата конечна одлука ќе ја соопшти во текот на летото, а извесно е дека нејзиниот ефект ќе се почувствува низ целата земја и во предизборната кампања која ќе утврди која партија го контролира Конгресот.