Заменикот на претседателот на Владата задолжен за економски прашања, координација на економските ресори и инвестиции, Фатмир Битиќи утрово се обрати на отворањето на втората конференција за глобално програмирање на Зелениот климатски фонд, која ќе се одржува од 13 до 15 септември во Инчеон, Република Кореја, информираат од владината прес служба, објави Greencivil.mk.
Воведно обраќање на отворањето на конференцијата имаше и извршниот директор на Зелениот климатски фонд, Јаник Глемарец.
„Чест и задоволство е да зборувам на отворањето на оваа година Глобална конференција за програмирање на Зелениот климатски фонд. Конференцијата се случува во многу клучен момент за сите нас, на глобално ниво. Не е само енергетската криза што влијае на повеќето економии на земјите во Европа, туку се соочуваме со голема природна катастрофа како што е неодамнешната поплава што го погоди Пакистан или неодамнешниот тајфун што ја погоди Кореја непосредно пред да пристигнеме на конференцијата. Без разлика на обемот, природните катастрофи ќе имаат влијание врз сите наши земји, изјави Битиќи во своето обраќање.
Тој истакна дека наша одговорност како Влади, не е само да подготвуваме политики и стратегии, туку во исто време и да развиваме и усвојуваме одржливи системи кои ќе се справуваат со климатските промени и другите предизвици за заштита на животната средина.
Битиќи посочи дека во текот на изминатите години Green Climate Fund (Зелениот климатски фонд) беше наш поддржувач и сојузник во различни проекти, преку кои реализиравме неколку активности за следење и рационализирање на климатските финансии, кои беа пилотирани и предложени како среднорочно решение, се додека не се обезбедат средства за клима во националните буџети.
Веќе почнавме да работиме на создавање на поволна средина за вклучување на приватниот сектор во климатските инвестиции врз основа на приоритетните сектори во земјата. За да го поттикнеме токму ова, го започнавме процесот на акредитација на Фондот за иновации и технолошки развој (ФИТР), да биде првиот национален ентитет акредитиран од ЗКФ, преку кој ќе создадеме поголеми можности за развој и имплементација на проекти поврзани со климата и во исто време и ЗКФ финансирани проекти, истакна министерот.
Тој се заблагодари за соработката со Зелениот климатски фонд како најголем фонд кој се занимава со климатски промени на глобално ниво.
Битиќи спомена неколку проекти на кои соработуваме со поддршката на GCF:
– Проект „Зелени градови“ со поддршка на ЕБОР;
– „Финансиски инструмент за опрема за ладење“ со поддршка на Светска банка, во рамките на кој ќе се формира Национален фонд за енергетска ефикасност; и
– „Глобален суб-национален климатски фонд“ за Техничка помош и капитал
Заедно со земјите од Западен Балкан, сме посветени да работиме кон целите за јаглеродно неутрален континент до 2050 година, преку инкорпорирање на строга климатска политика и реформирање на енергетскиот и транспортниот сектор, преку одредени активности. Ќе спомнам неколку:
– Да се стремиме кон намалување и постепено укинување на јагленот и промовирање на декарбонизацијата во регионот
– Зголемување на можностите за решенија за ублажување и прилагодување кон климатските промени
– Поддршка на шеми за реновирање на приватни и јавни згради, обезбедување соодветно финансирање и зголемување на уделот на обновливите извори на енергија
– Поддршка за развој на паметна инфраструктура, промовирање на поттикнување на иновативни технологии и зајакнување на меѓурегионалната соработка како што е прикажано со иницијативата Зелени патеки/Коридори
Министерот нагласи дека сите овие преземени и планирани акции носат со себе предизвици, секако, но во исто време и можност за зелен раст, можност за создавање зелени работни места и позелена планета.
Глобалните инвестиции за постигнување на целите на Парискиот договор за клима бараат итни дејствија – пред сè – за климатските политики. Политиките треба да бидат придружени со соодветни финансиски текови за да се затвори големиот финансиски јаз на глобално ниво, како и кај земјите во развој, рече Битиќи.
Според него, финансирањето на приватниот сектор за климатска акција е со повеќекратни ограничувања, за кои сме свесни, а во нив се вклучени факторите на страната на понудата и побарувачката, макро-финансиските и микроекономските пречки, високите инвестиции во фосилни горива и ограничувањата поврзани со научни податоци.
Битиќи посочи дека како резултат на овие и други ограничувања, предизвикот останува во привлекувањето финансирање во проекти за ублажување и адаптација. Овие типови проекти најверојатно ќе привлечат мал број на специјализирани инвеститори.
Нашата работа штотуку започна и нема да застане тука, додаде Битиќи. Продлабочување на соработката со Зелениот климатски фонд е нешто за што сме подготвени како и со нашите партнери од ЕУ, различни акредитирани субјекти и земји од регионот во постигнувањето на поставените цели, бидејќи овие цели не може да се постигнат поединечно од секоја земја.
Битиќи се заблагодари на Зелениот климатски фонд за целата досегашна соработка и поддршка.
Тој своето обраќање го заврши со новиот концепт што треба да се развие за заеднички да успееме –
Треба да го напуштиме воспоставениот концепт на зависности и да се префрлиме во нова ера каде меѓузависноста ќе биде нашиот пат напред, и тоа ќе ја катализира климата на иновации: со инвестирање во нови технологии, деловни модели и практики, нагласи Битиќи и додаде дека очекува плодни дискусии и соработки од оваа конференција.
М.Д.
