„Веруваме дека Северна Македонија има покажано дека е подготвена за нејзината прва меѓувладина конференција, која се надеваме дека сè уште ќе може да се случи што е можно побрзо, рече американската амбасадорка во земјава Кејт Мари Брнз во интервју за Гласот на Америка.
„Разочарани сме од ветото на Бугарија поради бројни причини, прво затоа што веруваме дека Северна Македонија беше подготвена да го почне процесот на отворање и затворање на поглавјата со ЕУ“, вели Брнз во интервјуто.
Таа додава дека ветото носи ризик не само за Северна Македонија, туку и за ЕУ, како и за прашањата поврзани со процесот на проширување во целина.
На прашањето дали очекува новата администрација на новиот претседател на САД, Џо Бајден, да изврши поголем притисок врз Бугарија за да го тргне ветото, Брнз вели дека САД се ангажирани во овој регион и во Северна Македонија со децении, особено во поддршката на земјава да влезе во НАТО, во поддршката на нејзините аспирации и напори да се приклучи кон ЕУ, како и во проширување на економската соработка и регионалната соработка во целина.
„Прво би сакала да кажам дека САД се ангажирани во овој регион и во Северна Македонија со децении. Јас би кажала дека во изминативе неколку години и многу интензивно вклучени во поддршката на Северна Македонија да влезе во НАТО, во поддршката на нејзините аспирации и напори да се приклучи кон ЕУ, како и во проширување на економската соработка и регионалната соработка во целина. Јас верувам дека таквиот вид на соработка ќе продолжи, и се разбира пред се` ќе биде фокусирана на нашата поддршка за евроатлантската интеграција на Северна Македонија. Тоа е основа на нашата политика овде, и има многу работа да се заврши, во смисла на поддршка на реформската агенда, како и да осигураме дека пристапниот процес во ЕУ оди напред“, вели Брнз во интервјуто за Гласот на Америка.
Американската амбасадорка вели дека е важно билатералните разговори да продолжат во некоја форма, а мислам дека тоа го препознаваат двете страни.
„Се надевам дека тие дискусии ќе продолжат на конструктивен начин и на соодветен начин за двете држави, и во инетрес на двете држави. Одвоено од тоа, важно е теренот да се држи подготвен и да се одвиваат преговорите за пристапниот процес во ЕУ. Веруваме дека Северна Македонија има покажано оти е подготвена за нејзината прва меѓувладина конференција, која се надеваме дека се` уште ќе може да се случи што е можно побрзо. Ние сме охрабрени што Португалија истакна дека проширувањето на ЕУ во целина ќе биде приоритет и за време на нејзиното претседателство“, вели таа.
Целото интервју со американската амбасадорка може да го прочитате тука.
