Од 1302 институции во Македонија, 197 институции немаат побарано согласност од Министерството за информатичко општество и администрација и немаат активна систематизација, а 150 и покрај одобрената систематизација не внесувале податоци во Регистарот – соопшти денеска министерот Дамјан Манчевски. Регистарот на вработените во јавниот сектор не ја рефлектира реалната состојба со бројот на вработени. Во моментов, се оперира со бројка од 115.729 вработени во јавниот сектор, но тоа не ја отсликува реалната состојба.
За голем број институции постојат сериозни индиции дека голем број на податоци не се уредно пополнети. МИОА во моментов, прави проверка на сите институции поединечно. Тоа што може да се заклучи од досегашната проверка е дека се работи за поголем проблем со податоците за вработените во јавниот сектор од тоа што беше очекувано.
МИОА ја информира јавноста дека ова министерство вчера до Државната изборна комисија доставило податоци за вработените во јавниот сектор што не се внесени во Регистарот на начин и постапка која е со закон предвидена. Податоците се добиени како резултат на вкрстување на бази на податоци од повеќе различни институции. Податоците доставени до ДИК се однесуваат на 115.729 вработени во јавниот сектор. Оваа бројка не е официјална и не ја претставува реалната слика.
Проблемот во Регистарот се рефлектира и на „Годишниот извештај на вработени во јавниот сектор“. Како резултат на непотполниот Регистар, Годишниот извештај за 2016 година е подготвен врз основа на податоците од повеќе државни институции како што се Централниот регистар, Фондот за здравствено осигурување, Агенцијата за вработување, Фондот за пензиско и инвалидско осигурување и Министерството за финансии.
