од корнер: ЗОРАН ИВАНОВ
Да, Македонија го промени своето уставно име за да ги добие НАТО и преговорите за ЕУ. Ама примарно Македонија го потпиша Преспанскиот за да ги добие развојните перспективи за себе. И од тоа стојалиште не се воопшто адекватни реакциите дека Македонија преку Преспа мора веднаш во Европа. Не, само може, ама не мора. Но како и да завртиш, Македонија со Преспанскиот, времето тоа неминовно ќе го потврди, е во голема добивка.
Во прилог на ова само неколку факти во корист на државата Македонија, на Северна ама Македонија:
Прво, решен е еден неразбирлив и токму поради тоа и тешко решлив меѓудржавен и меѓусоседски спор;
Второ, да не го стореше тоа, деновиве на самитот на ЕУ во Луксембург, Македонија воопшто не ќе беше ниту спомната, ниту некаква тема на темата „проширување“. Ќе си останевме закотвени на европското дно;
Трето, еве НАТО, токму поради Преспанскиот, е завршена приказна. Полноправна членка ќе е годинава или е само техничко прашање за до половина на наредната;
Четврто, земјава, главно поради или, поточно, благодарејќи на Преспанскиот, се ослободува од робувањето на некои историски заблуди и од нивните непродуктивни романтизми;
Петто, со Преспанскиот, во напливот на оваа глобална информатичка ера, за Република Северна Македонија е отворен нов развоен хоризонт; и
Шесто, сето друго од критериумите за во ЕУ е задача за овде, за нас дома. Самите да си ги спастриме и нашиот дом и нашиот двор.
И покрај разочарувањата и напливот од негативни емоции поради француското гледање на нашите актуелни состојби, убаво е, и отрезнувачки е, да си се соочиме и со фактот дека Македонија е институционално разградена. Дека ниту прво за себе, а потоа ниту за ЕУ, сѐ уште не испорача ниту една видлива и одржлива реформа. И дека како и досега, така и отсега, сѐ од нас ќе зависи.
Моќните Макрон и Меркел синоќа од Луксембург најдиректно ни порачаа: „Чиниите од кои си сркате, ќе морате да си ги измиете вие самите “.
Преземање на содржините e ЗАБРАНЕТО (!!!), освен со писмена дозвола од ЦИВИЛ и тоа исклучиво според Условите за користење, авторски права и заштита на приватноста. Повредата на авторските права е забранета со закон.
Со преземање на било која содржина објавена на ЦИВИЛ Медиа, спротивно на Условите, се согласувате на ЦИВИЛ да му исплатите надоместок од 25.000 денари во рок од осум дена по преземањето на содржината. Оваа обврска не застарува, а за секое доцнење на исплатата ќе биде пресметана соодветна законска камата.
Доколку некоја содржина е потпишана со ЦИВИЛ Тим за комуникации, тогаш преземањето е дозволено во целост.
