Демонстрантите во Бангладеш ја вандализираа и ја запалија поранешната семејна куќа на сменетата премиерка Шеик Хасина, како и домовите на другите членови на нејзината партија.
Немирите беа предизвикани од веста дека Хасина ќе и се обрати на земјата преку социјалните мрежи од Индија, каде што е во егзил откако минатата година беше соборена од протестите предводени од студентите, објави Би-би-си, пренесува ЦИВИЛ Медиа.
Седумдесет и седумгодишната Хасина, која беше на чело на Бангладеш 20 години, се сметаше за автократ чија влада безмилосно го угнетуваше несогласувањето.
Во средата вечерта, багер ја урна куќата на починатиот татко на Хасина, шеикот Муџибур Рахман, кој е и основач на Бангладеш. Структурата била пренаменета во музеј.
Таткото на Хасина нашироко се смета за херој на независноста, но гневот кон неговата ќерка го оцрни неговото наследство меѓу критичарите на Хасина.
Во живо на Фејсбук, Хасина го осуди нападот и побара „правда“.
„Можат да урнат зграда, но не можат да ја избришат историјата“, рече таа.
Подготви: Д. Мишев