Во Собранието на Република Северна Македонија денеска претпладне на иницијатива на претседателот Талат Џафери ќе заседава парламентарното претседателство кое треба да разговара како ќе продолжи со работа законодавниот дом, по синоќешната седница која беше прекината, а петтиот сет антикризни мерки не беше донесен.
На состанокот на претседателството на Собранието, согласно Законот ќе присуствуваат Џафери, двајцата потпретседатели Горан Мисовски и Фадил Зендели, како и генералниот секретар на Собранието Цветанка Иванова.
Џафери на вчерашната седница најави дека ќе побара карантин за Собранието бидејќи поради отсуство на неколкумина пратеници од владејачкото мнозинство поради Ковид-19 и други здравствени проблеми, како и одбивањето на опозицијата да направи кворум за да се донесат законите од 32. седница. Не беа донесени ниту законите од петтиот сет антикризни мерки, за кои опозицијата се изјасни дека ќе гласа.
Според информациите од Собранието, малку е веројатно дека ќе биде поддржана идејата на претседателот Џафери за воведување карантин, туку ќе се инсистира уште денеска да бидат донесени законите од петтиот сет антикризни мерки, помош што ја очекуваат илјадници граѓани и стопанственици.
