Во интервју за софиската Нова ТВ европратеникот Ангел Џамбаски најави дека ќе дојде на 4 февруари во Скопје иако не го планирал тоа, но сега е решен да го посети гробот на Гоце Делчев токму затоа што претседателот Стево Пендаровски бара да му се забрани влез во Северна Македонија. На Пендаровски му испрати порака преку која тој би требало да се потсети на судбината на српскиот крал Александар Караѓорѓевиќ, (кралот беше убиен во атентат во Марсеј во 1934 година,од страна на Владо Черноземски).
Џамбаски на социјалните мрежи веќе се чекираше во црквата Свети Спас и се пофали дека, на 4 февруари, ќе дојде во Скопје.
Првиот човек на МВР, Оливер Спасовски не кажа дали на бугарскиот европратеник ќе му биде дозволен влез во Северна Македонија доколку тој одлучи да дојде на одбележувањето на раѓањето на Гоце Делчев во земјава.
Премиерот Димитар Ковачевски, пак, денеска од Штип нагласи дека на МВР е да ги преземе сите мерки за безбедно чествување на 4 февруари, но и дека Министерството може да постапи согласно Законот за странци, односно одредбите кои регулираат кое лице не може да влезе во државата заради активности кои ги нарушуваат меѓународните односи на нашата држава и внатрешниот поредок.
Претседателот Пендаровски предложи да се забрани влез на повеќе лица од Бугарија, меѓу кои и на еден пратеник во Европскиот парламент. Иако не го спомна по име Ангел Џамбаски, во одговор на новинарско прашање не негираше дека се работи токму за бугарскиот европратеник, кој неодамна беше во Скопје на одбележувањето на годишнината од смртта на Мара Бунева и среде Скопје изјавуваше дека Македонија е бугарска.
