пишува: АЛЕКСАНДАР Н. ПИСАРЕВ
Ни еден американски претседател не можел толку да ја извалка, да ја наруши и да фрли сенка на американската демократија и на настаните кои се јадро на изборната традиција во САД, како што тоа го направи бившиот американски претседател Доналд Трамп. Не е далеку од вистината дека времето во Америка во иднина ќе се дели на период пред и после четиригодишното владеење на Доналд Трамп.
На 20 јануари, точно напладне, Џозеф Робинет Бајден Помладиот ја положи заклетвата и стана 46 претседател на Соединетите Американски Држави. Но првпат во американската историја, после повеќе од 150 години стара традиција, поразениот кандидат (Трамп) официјално не го призна поразот на изборите и како претседател во заминување не присуствуваше на церемонијата на инаугурација на човекот кој ќе го замени во Белата Куќа. Ова е пресвртница во развојот на американската демократија.
Според Законот за пребројување на гласовите кој е донесен 1887 година, 6 јануари во САД е одреден како ден на завршната фаза во изборниот процес за американскиот претседател, на тој ден актуелниот потпретседател, како претседавач на Сенат на американскиот Конгрес ги брои електронските гласови кои што ги освоиле претседателските кандидати и ја потврдува конечната изборна победа на еден од кандидатите. Практично, го прогласува новиот претседател на САД. Овој чин традиционално поминува мирно, без политички несогласувања и не привлекува големо внимание. Меѓутоа, она што се случи на годинашнава инаугурација на новиот претседател во просториите во и околу Капитол, беше далеку од демократска процедура и нормите на однесување на една од најстарите демократии во светот.
Светот беше запрепастен и згрозен од однесувањето на стотици приврзаници на Доналд Трамп и Републиканската партија кои, незадоволни од изборните резултати и предозирани со лажните вестите за изборната кражба на гласовите на нивниот кандидат, насилно и вандалски влегоа во седиштето на американска демократија дивјачки барајќи да се признае победа на нивниот кандидат.
Вандализмот и физичко насилство со смртни последици (загинаа пет луѓе меѓу кои и еден полицаец на Капитол) и скрнавење на законодавниот дом на САД загрижувачки опоменува дека и Америка влегува во фаза на политички екстремизам и насилство, бидејќи покрај републиканските избирачи убедени во победата на Трамп кои бараа да се запре кражба на гласовите, во нападот врз Капитол учествуваа и приврзаници на екстремната десница кои во Трамп гледаа мецена за остварување на сопствените цели.
Самата иконографија која можевме да ја видиме на фотографиите кои ја обиколија планетата е загрижувачка и застрашувачка, вклучително и еден од натписите на црна тренерка на еден од демонстрантите на која под череп со вкрстени коски пишуваше „Камп Аушвиц“.
Непосредно по упадот во Капитол, аналитичарите предупредија дека меѓу приврзаниците и поддржувачи на Трамп и неговата политика беа и членовите на крајна десница убедени во теориите на заговор концентрирани во движењето КјуАнон (QAnon). Лидерот на мнозинството во американскиот Сенат, републиканецот Мич Меконел, уште за време на нередите, изјави дека претседателот Доналд Трамп е тој што ги испровоцирал, бидејќи на толпата која се собрала им сервирал лаги околу пребројување на гласовите.
ШТО Е КЈУАНОН?
Настаните во Капитол го ставија под рефлектор и феноменот КјуАнон, бидејќи симболите и иконографијата за време на вандализмот врз Капитол беа очигледно инспирирани токму од приврзаниците на оваа ултрадесничарска теорија.
Што е всушност КјуАнон, што претставува, од каде потекнува и како се шири низ светот?
Тие веруваат во теории на заговорот, односно наоѓаат и поставуваат врски меѓу познати факти и доаѓаат до „заклучокот“ дека со светот владее мрежа на група луѓе – глобалисти кои се воедно и сатанисти. Меѓу оние што според КјуАнон, владеат со светот, спаѓаат Барак Обама, Клинтонови, Џорџ Сорос, Том Хенкс, Елен Деџенерис, папата Фрањо и уште многу други личности. Сите тие, според КјуАнон, владеат со планетата, го контролираат подземјето, се состануваат буквално во тунелите под големите градови, киднапираат деца и ја пијат нивната крв за подмладување и сопирање на стареењето. Тие во Доналд Трамп гледаат месија и надеж да го спаси светот од глобалистите и сатанистите и затоа се убедени дека му е украдена изборната победа.
Користејќи ја современата интернет технологија, тие масовно шират дезинформации и теории на заговорот, така што за кратко време станаа мејнстрим на американската и не само на американската десница. Тие ги демонизираат политичките противници и неистомисленици и ги поларизираат САД и светот. Движењето доби голем број на приврзаници посебно за време на владеењето на Доналд Трамп. Тие се убедени дека победата на Бајден ќе ја одведе Америка во пропаст.
Тие не ги посматраат изборите во Америка како политички натпревар, туку како битка меѓу доброто и зло. Противниците на Трамп за нив се предавници и во таква ситуација кога земјата е на „работ на пропаст“ кај нив не постои дилема дека употребата на сила за да се поништи „изборниот фалсификат“ е единствениот начин да се спречат катастрофалните последици кои ќе се случат во Америка со устоличување на Бајден.
За жал, заканата од овие групи нема да исчезне со стапување на Бајден на функција претседател на САД. Тоа го најави и самиот Трамп во прошталното обраќање до нацијата со порака „Нашето движење само што започна“.
Тој пред нацијата ѝ посака успех на новата администрација, но не го спомна Џо Бајден по име. Тој е и понатаму убеден во нерегуларноста на изборите и нему ја честита победата на Бајден.
„Оваа недела ќе ја инаугурираме новата администрација и се молам за нејзиниот успех да Америка остане безбедна и просперитетна“. Откако ги истакна своите заслуги за создавање на „најдобрата економија во светот“ тој ги „потсети“ Американците дека најголемата опасност која ѝ претстои на Америка е губење на довербата во самите себе, губењето на довербата во големината на нацијата.
„Сега, додека се подготвувам да ја предадам власта на новата администрација, сакам да знаете дека движењето кое го започнавме е само почеток на нашата борба. Се повлекувам полн со оптимизам и голема верба дека најдоброто е пред нас“.
Сите права се задржани. ЛИНК: Услови за користење, авторски права и заштита на приватноста. Текстот е личен став на Авторот.
