ВЕСТ НА ДЕНОТ
Владата ќе му префрли шест милиони евра на ЕСМ за да го преземе управувањето со БЕГ и Скопје Север
Владата ќе префрли шест милиони евра на сметката на АД ЕСМ за да го преземе управувањето, дистрибуцијата, снабдувањето и производството на топлинска енергија за град Скопје за целата грејна сезона од моменталниот носител на лиценцата БЕГ, потврди денеска министерот за економија Крешник Бектеши.
Овие средства, како што кажа при денешната посета на општина Сарај, ќе се користат и во делот на плаќањето на разликата од реалната и постојната цена на топлинска енергија за цела 2022 година.
Прашан дали само шест милиони евра ќе бидат доволни за целата грејна сезона, Бектеши рече дека таквите проекции се направени од страна на ЕСМ, Регулаторната комисија за енергетика и раководството на ЕСМ – Енергетика, која произведува топлинска енергија, согласно постојните цени и берзанските цени на природниот гас за јануари.
ИЗЈАВА НА ДЕНОТ
– Важно е сите ние како ЕУ, а тука припаѓа и Бугарија- да си го одржиме ветувањето кон Северна Македонија и Албанија. Ние сме подготвени да го поддржиме тој процес, но во најголем дел се работи за билатерален процес. Мислам дека и за новата бугарска влада приоритет е да продолжи со сопствената реформска агенда и дека постои желба историјата да им се остави на историчарите, изјави државната министерка во германското Министерство за надворешни работи, Ана Лирман.
ФЛЕШ ВЕСТИ
ПОЛИТИКА Помалите партии му порачаа на лидерот на ВМРО ДПМНЕ Христијан Мицковски да не смета на нивната поддршка за предвремени парламентарни избори. Тие се децидни дека промената на изборниот модел од шест во една изборна единица е позитивен чекор, но дека тоа не значи поддршка на идејата на Мицковски за предвремени парламентарни избори, пренесува Бриф.мк.
СТРАТЕГИЈА Во просториите на МНР денеска се одржа тематска дискусија во рамки на проектот Рефлексија2030, чија цел е резвивање на Стратегијата за надворешна политика за следните 10 година. Денешната дебата, како што соопштија од МНР, беше посветена на претседавањето на Република Северна Македонија со ОБСЕ во 2023 година.
АЛАРМИРАЊЕ Центарот за управување со кризи доби известување од ЕВН за нестабилна карпа во реонот на кањонот Матка, што се наоѓа стотина метри високо над самиот ѕид на браната. Оваа карпа се наоѓа во ваква позиција долго време, според добиените фотографии може да се забележи одредена нестабилност а ние како институција испративме барање до повеќе релевантни институции коишто треба да излезат на терен, информираше денеска директорот на ЦУК, Стојанче Ангелов, пренесува информативната агенција МИА.
ЧОВЕКОВИ ПРАВА Генералниот секретар на Обединетите нации (ОН), Антонио Гутереш предупреди дека ситуацијата во светот денеска е значително полоша отколку пред пет години, поради пандемијата со Ковид-19, климатската криза и поради геополитичките тензии, кои предизвикаа бројни конфликти. Но, за разлика од американскиот претседател Џо Бајден, тој смета дека Русија нема да ја нападне Украина.
ДИСТРИКТ
Во ДИСТРИКТ на Цивил Прес Студио – интервју на Зоран Иванов со Боби Иванов, моторист, натовец, филозоф. Тој зборува за: мотрите и страста, коренот и идентитетот, филозофијата и прагмата, демократијата и дистопијата и за уште по нешто.
БРЗА ПОШТА
„Подземни пагани инструираа десетина заблудени момчиња веќе израснати на прагот на мажи, подготвени и навежбани на суво, наместо со љубов за светото Исусово крштевање, продадоа магла, расфрлаа пизма. Го избербатија светиот ден и светиот настан. Го исфлекаа со политика. Поплукаа по Исус, го урнисаа духот на верата.
Извинувањето од Владиката, организаторот на настанот, вообичаено изостана. И институцијата Црква уште не се огласи да поучи и да порача дека верата не е политика и дека алтернатива на хорското „никогаш северна“ неизбежно е „секогаш поранешна“, пишува Зоран Иванов во БРЗА ПОШТА „Никогаш северна – секогаш поранешна“.
СЛОБОДНА ЗОНА
„Тврдењето дека НАТО сака да ја опколи Руската Федерација е без основа. Само пет од триесетте сојузници се соседи на Русија, со само 1/16 од нејзините граници се граничи со НАТО. Ако дефиницијата да се биде опкружен е дека 6% од вашиот периметар е блокиран, тогаш без сомнение храбрите луѓе кои се бореле во Арнем или Ленинград во Втората светска војна би имале што да кажат за тоа.
На Кремљ, всушност, не му се заканува распоредот на силите на НАТО, туку привлечноста на неговите вредности. Исто како што знаеме дека неговите дејства навистина се однесуваат на она како претседателот Путин ја толкува историјата и неговите недовршени амбиции за Украина“, пишува Бен Валас, министер за одбрана на Обединетото Кралство, во колумната „Тврдењата на Кремљ се без основа“.
„Одговорност не е да се живее наивно и да се верува во разно разни приказни дека некои што прават милиони врз грбот на народот или преку криминални дејанија ќе се откажат од тоа за општото добро. Таквите видовме дека имаат создадено или украдено за поколенија и по нив.
Уште еднаш треба да се потсетиме на народната поговорка: Ситиот на гладниот не му верува и баш му е гајле! Нека оваа поговорка не потсетува секојдневно за да подразбереме дека поради криминални дејанија на поединци пред кои замижуваме, поради дејствување спротивно од приоритетите на народот не можеме да ја искусиме праведната транзиција во која чекори Европската Унија“, пишува Стевче Дечев во колумната „Праведна транзиција или ситиот на гладниот не му верува и баш му е гајле! (прв дел)“.
Д. Муратов
