Државата ги изложила сексуалните работници на нехуман и понижувачки третман додека биле лишени од слобода во полициска станица, оставени цела ноќ без храна, вода и пристап до тоалет. Вака пресуди Европскиот суд за човекови права во случајот Д.Х. и други против Северна Македонија бр. 44033/17.
Како што соопштија од Здружението ХОПС, Судот утврдил повреда на правото на приватност поради објавата на фотографии од жртвите на интернет-страницата на Министерството за внатрешни работи (МВР) без да биде прикриен нивниот идентитет и ја задолжил државата да им исплати износ од 13.300 евра за претрпените повреди и неефикасната заштита на нивните права пред домашните судови.
Од ХОПС потсетуваат дека во ноември 2008 година, МВР со спектакуларна акција наречена „Сузбивање на улична проституција“ приведе 23 сексуални работници, активистка на здружение на граѓани и неколку случајни минувачи кои биле затекнати покрај кејот на реката Вардар.
Сексуалните работници, без да бидат информирани за причините за лишување од слобода, биле задржани цела ноќ во полициската станица Бит Пазар, а следниот ден биле однесени на Клиниката за инфективни болести и фебрилни состојби каде биле тестирани за крвно и сексуално преносливи болести, по што биле пуштени на слобода.
„За цело време додека беа лишени од слобода, на сексуалните работници од страна на полициските службеници им беа упатувани погрдни зборови и беа изложени на понижување и исмевање. Сите 23 приведени сексуални работници, ноќта ја поминаа во мала просторија, без пристап до храна, вода и тоалет, а дел од нив биле во апстиненцијални кризи со дијареја и повраќање“, соопштија од Здружението ХОПС.
Неколку месеци по настанот, со поддршка на здружението, 13 сексуални работници поднеле тужба за заштита на нивните лични права пред граѓанскиот суд во Скопје кој во два наврати утврдил повреда на правата и ги задолжил МВР и Кривичниот суд да ја надоместат штетата за извршените повреди. Откако Апелациониот суд ја преиначи пресудата, четири од жртвите борбата ја продолжиле пред Европскиот суд за човекови права.
„Оваа пресуда, иако со задоцнување, е потврда дека државата има обврска да ги почитува правата на сите и со темелна и ефикасна истрага да ги испита наводите за нехумано и деградирачко постапување, особено кога истите доаѓаат од ранлива група на граѓани“, велат од ХОПС.
Од здружението ги повикаа надлежните институции навремено да ја спроведат одлуката на Европскиот суд за човекови права, да ги заштитат правата на сите жртви од полициската акција во 2008 година и да преземат мерки во иднина институциите да се воздржат од дејствија со кои ги повредуваат правата на сексуалните работници.
извор: МЕТА
