Министрите за одбрана на ЕУ денеска ќе имаа средба во Советот на ЕУ, а Украина останува главна тема, но ќе се разговара и за ситуацијата во Мали, јави дописничката на МИА од Брисел.
Како што најави високиот претставник за надворешна политика на ЕУ, Жозеп Борел, министрите денеска формално ќе бидат информирани за одлуката да се испратат дополнителни 500 милиони евра воена помош за Украина од Мировниот фонд на ЕУ.
Во текот на денот на министрите ќе им се придружи министерот за одбрана на Украина, Олекси Резников, а подоцна и генералниот секретар на НАТО, Јенс Столтенберг.
– Мораме да продолжиме да ги поддржуваме Украинците со оружје, ќе одобриме дополнителни 500 милиони евра од одбранбениот фонд, потврди Борел.
Министрите ќе разговараат и за потребата да ги зголемат буџетите и капацитетите за одбрана во ЕУ, рече шефот на ЕУ дипломатијата.
Тој истакна и дека целосно го поддржува членството на Шведска и на Финска во НАТО, додавајќи оти се надева дека Северноатлантската алијанса ќе успее да ги надмине приговорите што ги има Турција кон членството на овие две европски земји во трансатлантскиот воен сојуз.
Членките на ЕУ ќе разговараат за ситуацијата во Мали и за усвојувањето на стратешкиот компас на ЕУ.
