Првиот од шесте квартални извештаи, дел од проектот „Зајакнување на финансиската отчетност и транспарентност во Македонија“ кои се предвидени за оценка на законодавните и регулаторни одредби, поврзани со работата на Државниот завод за ревизија (ДЗР), беше презентиран денеска.
Проектот треба да обезбеди кредибилни информации за граѓан(к)ите во однос на трошењето и работата на јавните институции и нивна транспарентност.
„Може да се чини дека е малку ирелевантно да се зборува за ова прашање, кога самата основа на парламентарната демократија е доведена во прашање, кога претседателот на државата одбива да ѝ дозволи на коалицијата партии што имаат јасно мнозинство во парламентот да формираат влада. Но, јас не се согласувам. Ова не е нерелевантно прашање, ова е далеку од тоа да биде второстепено прашање. Работата што се одвива преку овој проект е од суштинско значење за демократијата“, рече британскиот заменикамбасадор Пол Едвардс.
Според Марјан Николов од Центарот за економски анализи, за ефект од работата на ДЗР за финансиска отчетност и транспарентност се потребни првенствено политички консензус и законски измени.
„Како општество треба да донесеме консензус и да престанеме да увезуваме кредибилитет од разни институции од странство за нешто што треба да биде основен фундамент на една парламентарна демократија. Само во тој случај, може да бидеме ефикасни како општество и да обезбедиме одржливост. Во спротивно, постојано ќе гледаме кон некој отстрана, не само да ни дијагностицира состојби, туку и да упатува кон нас, а ние да прифаќаме по слободна волја, условно речено, нешто што не би сакале да прифатиме“, рече Николов.
Дамир Незири од Фондацијата за демократија на Канцеларијата на Вестминстер во Македонија, рече дека ДЗР успешно истражува и оценува каде се трошат јавните пари, но оти недостасува следење на препораките што ги дава до институциите.
„Тие треба да бидат под близок парламентарен надзор, односно, во парламентот, сè уште не се отвора дискусија за извештаите на ДЗР“, рече Незири, кој потсети дека оваа забелешка е нотирана и во Извештајот на Европската комисија.
Преку проектот и извештаите, во наредните 18 месеци ќе се мери перцепцијата за транспарентност на медиумите, Собранието, Министерството за внатрешни работи, Јавното обвинителство, Државната комисија за спречување корупција, како и резултатите од работата на ДЗР.
Ќе се оценува дали пратениците и Собранието се свесни за моќта и улогата на работата што ја има ДЗР.
Носители на проектот што е поддржан од Британска амбасада се Фондацијата за демократија на Вестминстер, Центарот за економски анализи и Институтот за комуникациски студии.
Марија Теговска
