Претставници на политичките партии и коалиции на претстојните предвремени парламентарни избори вчера во Државната изборна комисија (ДИК) потпишаа Кодекс за фер и демократски избори. Апелите од ДИК и од претставниците на учесниците на изборите се исто така насочени кон почитување на мерките за заштита од Ковид-19.
Изборната кампања за парламентарните избори што ќе се одржат на 15 јули почнува в среда, на 24 јуни и ќе трае до 12 јули на полноќ.
Претседателот на ДИК, Оливер Деркоски, по вчерашното потпишување на Кодексот за фер и демократски избори истакна дека претстојните избори 2020 година ќе се одвиваат во исклучително сложена ситуција, пред се поради пандемија од Ковид 19. Најави дека во наредните денови ќе бидат изготвени здравствените протоколи врз основа на кои ДИК ќе направи упатства за гласање.
„Предизвик на сите нас кои го организираме процесот, меѓутоа и пред сите кои учествуваат во процесот. Јас се надевам дека сите учесници ќе си земат обврска да ги испочитуваат протоколите за заштита на здравјето на граѓаните, а до граѓаните апелирам да веруваат во институциите дека овој процес ќе се организира на најдобар можен безбеден начин за да можат да го остварат своето право на глас. Впрочем, тие се на ред на наредните избори за да можат да го дадат својот глас и да одлучат понатаму како ќе се одвива состојбата во нашата држава“, истакна Деркоски.
Партиите ветија фер и демократски избори и најавуваат дека ќе се фокусираат на кампања која ќе биде безбедна по здравјето на граѓаните.
Љупчо Николовски од СДСМ истакна дека ги откажуваат митинзите, големите собири и сите потенцијално ризични настани.
„Ќе бидеме со вас преку социјалните мрежи, медиумите, преку дигитални алатки и други канали“, истакна Николовски.
Генералниот секретар на ВМРО-ДПМНЕ, Игор Јанушев, вчера изјави дека кампањата која ќе ја водат ќе биде поинаква од онаа порано, дека дел ќе биде преку социјалните медиуми, телевизии и други медиуми, а ќе имаат и теренски активности.
„Факт е дека ќе има и теренски активности, во кој обем и во каков вид ќе бидат ќе видиме, но големи митинзи нема да се случуваат, барем не во таков обем. Секако дека ќе пробаме да пристапиме кон секој еден гласач почитувајќи ги мерките за заштита“, истакна Јанушев.
Под услови на пандемија, од ДУИ велат дека ќе мора да ја тераат кампањата, така што ќе се обидат да бидат заштитени во целост сите граѓани во земјава и во текот на кампањата и во текот на изборниот процес во деновите за гласање.
Според Биљал Касами од БЕСА, компромисот постигнат за одржување на изборите е добра волја и покрај тоа што истите ќе се одвиваат во вонредни услови.
„Загрижувачко е зголемувањето на бројот на заразени, но загрижувачки е што државата нема функционална влада и функционални институции. Стабилната политичка влада може да биде во служба на граѓаните, како во поглед на здравството, така и од аспект на економијата“, изјави Касами.
Предвремените парламентарни избори ќе се одржат на 15 јули, среда, и ќе биде неработен ден за сите граѓани. Тој ден избирачките места ќе бидат отворени во 7 часот, и истото ќе биде продолжено 21 часот, два часа подолго од претходните избори кога избирачките места се затвораа во 19 часот.
На 13 јули ќе гласаат лицата кои се во домашен карантин поради позитивен тест на КОВИД-19 и лицата кои се во самоизолација со решение од Државен санитарен и здравствен инспекторат.
На 14 јули ќе гласаат немоќните и болните лица, како и хронично болните и останатите лица кои согласно Изборниот законик гласаат еден ден пред одржување на изборите.
Партискиот договор за одржување на предвремени парламентарни избори на 15 јули годинава, резултираше со прогласување нова вонредна состојба од страна на претседателот на државата Стево Пендаровски во траење од осум дена.
А. П.
