Граѓаните преку социјалните мрежи се организираат за протест пред Силбо каде што вчера беше прегазена 22 годишната студентка Фросина Кулакова.
Повици за протест за денеска во 13 часот се со барање да се подигне безбедноста во сообраќајот но и одговорност за судијата кој му го укинал притворот на 20-годишниот возач Васил Јованов, кога го осудил за поседување на дрога.
„Утре, освен што ќе ги “бојкотирате” маркетите, појдете на “Партизанска”, пешачкиот кај Силбо, во 13:00 и заедно да го блокираме булеварот!!! Можеби некој од надлежните ќе отвори очи!!! А, и ние родителите, да си ја чукнеме малку главата!!!“, стои во најавата.
Обвинителството одреди 30 дена притвор за 20 годишниот Васил Јованов што ја прегази студентката Фросина Кулакова од Неготино. Возел пијан, без возачка дозвола и поминал на црвено на семафарот кај Силбо.
„Пред пешачкиот премин регулиран со семафори кои за време на незгодата работеле исправно, продолжил со движење на вклучено црвено светло на семафорот и со предниот лев дел од возилото удрил во телото на пешакот-жртва Фросина Кулакова, која на обележан пешачки премин попречно ја преминувала коловозната лента. Од ударот оштетената се здобила со тешки телесни повреди од кои на лице место починала“ стои во соопштението на Јавното обвинителство.
Дваесет годишниот Јованов кој ја прегази Фросина и претходно бил во притвор, но за друго кривично дело, неовластено производство и пуштање во промет на наркотични дроги и психотропни супстанци. Кривичен тогаш пресудил дека момчето треба да оди во воспитно поправниот дом Тетово. Јавен обвинител барал притвор, но при изрекување на пресудата судот ја укинал оваа мерка. Обвинителот ја обжалил одлуката на судот и предметот во моментот е во жалбена постапка, објаснуваат од Основното јавно обвинителство.
М. Д.
