ЉУБОМИР КОСТОВСКИ
Пренесувам една вест од Загреб која веројатно никогаш нема да осамне во нашите медиуми. Во мејнстрим медиумите секако не, а и во оние другите просто не се читаат многу новости од регионот, освен ако не се од Србија.
Во сликата која е приложена ќе видите како една министерка од актуелната влада на Пленковиќ денес влезе во затворот Реметинец. На влезот им испрати бакнеж на новинарите, дел на оние кои ја открија аферата во која таа замешала прсти.
За кого се работи?
Поранешната министерка за регионален развој и фондови на ЕУ, Габријела Жалац, се јави во затворот непосредно пред 22:00 часот за да ја отслужи двегодишната затворска казна за скандалот со софтверот. Нејзиниот рок беше да го стори тоа до полноќ денес, но не чекаше до последен момент за да го исполни. Всушност, требала да се јави на отслужување на казната на 6 октомври, но побарала одложување поради деловни причини. Беше одбиена, а откако се пожали, повторно беше одбиена.
Премиерот Андреј Пленковиќ, во чија влада беше министерка, денес коментираше дека „му е жал што се случи“ таа да мора да оди во затвор. Тој исто така рече дека Жалац повеќе не е член на ХДЗ.
„Таа очигледно проценила дека наместо долга судска постапка, овој вид на спогодба е подобар за неа. Штета е што се случи“, рече Пленковиќ.
Во јуни, Окружниот суд во Загреб ја осуди поранешната министерка Жалац на две години затвор за преплата за софтвер за Министерството за регионален развој и фондови (MRRFEU), кое го водеше таа. Европското јавно обвинителство (EPPO) во Загреб во тоа време извести дека пресудата е резултат на договор меѓу страните, бидејќи Жалац се изјаснила за виновна по своите обвиненија, а пред да го потпише договорот, платила 200.000 евра делумна отштета, додека правото на доверителот да бара отштета за други штети според принципот на солидарна одговорност не е исклучено.
Во септември, Жалац беше осудена на седум месеци затвор во Окружниот суд во Загреб за злоупотреба на положбата и овластувањата, односно плаќање приватни трошоци со јавни пари. И таа пресуда беше резултат на признание и спогодба со ЕКЈО, која извести дека за време на истрагата, Жалац платила повеќе од 9.700 евра целосно на име штета.
Ова се случува значи за злоупотреба на европски пари – актуелен случај и кај нас! Потоа европското обвинителство е тоа кое ја водело постапката и ја истерало до крај, односно до признание на криминалот и одредување на пониска казна од можноста во случај да се „терала правдата до крај“ за што се залагал премиерот.
Она што е битно е дека Хрватска како членка на ЕУ мора да затвора втор министер од владата на Пленковиќ, колку што јас се сеќавам (првиот беше министерот за здравство кој се уште се „фемка“ со разни правни лекови). Е како очекувате дека ВМРО – ДПМНЕ ќе сака да влеземе во ЕУ, ви се молам?
М. Д.
Преземено од Фејсбук профилот на Авторот
ЦИВИЛ МЕДИА | Ставовите и наодите во овој текст се целосна одговорност на авторите и не нужно ги претставуваат ставовите на донаторите или на другите партнери и соработници на организацијата.
