Македонија постигна напредок во спроведувањето на препораките за спречување на корупцијата меѓу носителите на високи извршни функции на ниво централната власт и полицијата, се наведува во извештајот на Групата на држави против корупцијата на Советот на Европа (ГРЕКО) по Петтата рунда на евалуација за усогласеност на земјата со претходно дадените препораки.
Во Извештајот на тема „Спречување на корупцијата и промовирање на интегритетот на централната власт и органите за спроведување на законот“, се заклучува дека земјава задоволително имплементирала 17 од 23-те препораки од Петтата рунда за евалуација од 2019 година, додека преостанатите шест препораки се делумно имплементирани.
Во претходниот, втор Извештај за усогласеност од 2023 година како задоволително имплементирани беа оценети 13 од 23-те препораки, девет како делумно имплементирани, а една како неимплементирана.
– ГРЕКО ги поздравува преземените чекори за подобрување на транспарентноста и промовирање на интегритетот во однос на лицата на кои им се доверени високи извршни функции. Новиот Правилник за работа на Владата сега овозможува јавен пристап преку интернет до листата на лица вклучени во владините поткомитети и работни групи. Усвоени се нови упатства за пријавување и обработка на подароци, а во тек е и развој на онлајн каталог со детали за подароците, се вели во Извештајот.
Како друг позитивен момент во документот се посочува создавањето на Електронска база на податоци за регистрирање и проверка на анкетните листови за имотот на избраните и именувани јавни функционери.
Во извештајот се посочува и дека до крајот на 2025 година се очекува да бидат усвоени измените на Законот за спречување на корупција и судир на интереси, со кои ќе се зајакне режимот на санкционирање на прекршителите на законските одредби.
– Исто така, спроведена е и анализа за проценка на процесите и практиките на Одделот за следење на имотната состојба на Државната комисија за спречување на корупција. Спроведувањето на препораките што произлегуваат од оваа проценка е во тек и ќе бара континуирано следење и посветеност за да се обезбедат видливи подобрувања, се наведува во документот.
Во однос на, како што се наведува, агенциите за спроведување на законот, ГРЕКО нотира напредок, особено во законската реформа насочена кон зајакнување на оперативната независност на полицијата и нејзините механизми за внатрешен и надворешен надзор.
– Сепак, потребни се понатамошни напори за да се обезбедат објективни и транспарентни проценки и да се зајакне заштитата на дојавувачите, се додава во документот.
Во извештајот се охрабруваат македонските власти да го информираат ГРЕКО за сите понатамошни случувања во врска со целосното спроведување на преостанатите препораки.
– ГРЕКО особено со нетрпение очекува напредок во воспоставувањето на регистар на подароци, во целосната операционализација на базата на податоци за електронски декларации за имотна состојба на избрани и именувани функционери, во подобрувањата направени во режимот на санкционирање за прекршувања на правилата за судир на интереси, интегритет и антикорупција, во промените во постапките за тестирање на интегритетот на полицијата, вклучително и нивната евалуација, како и во практичната примена на законодавството за заштита на дојавувачите во рамките на полицијата, се нагласува во Извештајот ,пренесе МИА.
