„По 11 годишно окупирање на државата, нејзино темелно материјално, духовно и институционално опустошување, ние сега стасавме до еден момент кој го нарекуваме демократско изјаснување на граѓаните, како една фаза на процесот на ослободување на земјата. Тоа е за мене пред се и над се чекорот кој што се вика референдум и во таа смисла го сметам за еден многу важен момент од нашиот тежок живот. Нешто што би требало да го има секое нормално општество. Значи го сметам како исчекор кон нормализацијата, ако веќе зборот ослободување е претежок“, изјави Ѓунер Исмаил во разговор со ЦИВИЛ Медиа на тема референдум и референдумски процес.
ЦИВИЛ Медиа: Како според Вас помина предреферендумската кампања?
Исмаил: Па, процесот на доаѓање до овие моменти коишто ги нарекуваме референдум всушност започна во оној момент кога на изборите во декември 2016 година политичките групации или партии беа носители на овој процес, го добија мнозинството во парламентот и фактички од 1 јуни 2017 година, откако ја добија довербата на парламентарното мнозинство го почнаа процесот на заздравување или доослободување на земјата. Во тој процес многу беше битно да се обнови патот на Македонија кон овие големи интеграции, важни интеграции, интеграции коишто ќе ни обезбедат долг живот, долг опстанок, поквалитетен живот и во таа смисла референдумскиот процес почна во оној момент кога се направи владата којашто во моментов е на сцена. И владата којашто го води овој процес на ослободување. Друг е проблемот, друга е маката, друга е темата на тоа како тој процес се води. Дали е доволно брзо, дали е доволно квалитетно, но тоа е тема која, се разбира, во некоја друга прилика ќе го заслужи нашето внимание.
ЦИВИЛ Медиа: Што по референдумот?
Исмаил: Несомнено е дека на референдумот ќе имаме сосема успешен резултат. Тоа е многу важно. А по референдумот не очекува можеби парадоксално, но и потешкиот дел на работата. Најнапред во тоа не го сметам она што ќе биде парламентарна процедура на модифицирање на Уставот согласно на Договорот со Грција, тоа е еден дел. Вториот дел ќе биде многу потежок и многу непријатен и во таа смисла мнозинството се разбира што е на власт во оваа земја ќе мора многу длабоко да се замисли како до сега го водела процесот и како од сега ќе го води процесот. Постепено ќе се отвораат поглавјата што не се само формални поглавја за интеграција во ЕУ на Македонија, туку тоа се поглавја што од нас ќе бараат суштински промени на нашето пред сè однесување кон она што е општо добро, кон она што е држава, кон она што е управување со таа држава, владеење на правото, законитост на сите нивоа, неселективност на правдата… Ние во недела ќе ги изгласаме тие работи, референдумот ќе ја заврши таа фаза, но во крајна линија потоа не очекува потешкиот дел на работите.
Не би сакал да бидам некој којшто ќе ги набројува бенефициите со коишто ќе се стекнеме како членка на НАТО или на ЕУ. Тоа не се бенефиции што подразбираат дека од чешмите ќе потече млеко или мед ќе има на сите страни. Напротив, ќе бараат многу работа од нас, но во поинаков амбиент и услови, со полесно дишење и побогат кислород.
Дехран Муратов
Камера: Атанас Петровски
Монтажа: Владо Крстевски
Фотографија: Ангела Петровска
Овa видео-интервју е дел од граѓанската иницијатива „Зачекори напред!“, финансирана од Фондацијата Отворено општество – Македонија. Содржината е единствена одговорност на авторите и на ниту еден начин не може да се смета дека ги изразува гледиштата и ставовите на граѓанската иницијатива „Зачекори напред!“
