Во израелските воени напади загинаа најмалку 40 Палестинци низ Појасот Газа додека во текот на денешниот ден израелските сили ја зајакнаа својата контрола околу Џабалија на северот од енклавата, во услови на жестоки битки со борците предводени од Хамас, пренесува Ројтерс.
Претходно утрово, израелски воздушен напад уништи три куќи во предградието Сабра во градот Газа, а локалната служба за цивилна итна помош соопшти дека извлекла две тела од местото, додека потрагата продолжила по 12 други лица за кои се верува дека биле во куќите за време на нападот.
Пет други беа убиени кога беше нападната куќа во кампот Нусејрат во центарот на Газа.
Џабалија е во фокусот на израелската офанзива повеќе од 10 дена, при што војниците се вратија во областите на северот кои беа под силно бомбардирање во првите месеци од едногодишната војна.
Канцеларијата за човекови права на Обединетите нации во вторникот соопшти дека израелската војска изгледа дека „целосно ја отсекува Северна Газа од остатокот од Појасот Газа“.
Израелската војска сега го опколи кампот Џабалија и испрати тенкови во блиските градови Беит Лахија и Беит Ханун, со декларирана цел да ги истисне борците на Хамас кои се обидуваат да се прегрупираат таму.
Израелската војска им порача на жителите да ги напуштат своите домови и да се упатат на безбедно во јужниот дел на Газа. Палестински и претставници на ОН велат дека нема безбедно место во Газа.
Во понеделникот, генералниот секретар на ОН, Антонио Гутереш ја осуди бројката на цивилни жртви во северниот дел на Газа.
Израел ја започна офанзивата против Хамас по нападот на милитантната група врз Израел на 7 октомври, во кој беа убиени 1.200 луѓе, а околу 250 беа земени како заложници во Газа, според израелски извори. Според здравствените власти на Газа, во офанзивата досега се убиени повеќе од 42.000 Палестинци.
А.М.
