Северна Македонија треба да продолжи да испорачува спроведување на реформите поврзани со ЕУ, особено во кластерот за фундаменталните вредности, како и судството, борбата против корупцијата и организираниот криминал. Треба да се зајакне довербата во правосудниот систем. Скрининг сесиите за сите шест кластери на правото на ЕУ беа завршени во декември 2023 година, се вели во резимето на извештајот за усвојувањето на пакетот за проширување на ЕУ, усвоен денеска во Европската Комисија.
Шефот на Делегацијата на Европската Унија, амбасадорот Михалис Рокас, денеска ѝ го предаде Извештајот на Европската Комисија за напредокот на земјата за 2024 година на претседателката Гордана Силјљановска-Давкова.
„Постојани и одлучни чекори се неопходни за забрзување на спроведувањето на реформите и напредок во пристапувањето кон Европската Унија“ – Брисел ја испрати пораката до Скопје во извештајот за Северна Македонија, документ кој Европската комисија го изготвува секоја година за секоја од земјите-кандидатки при што не беше пропуштено да се повтори дека во оваа геополитичка ситуација „во интерес на Европа е да продолжи да се проширува“, објави Глас на Америка.
„За нас, проширувањето останува централно за нашиот геополитички пристап. Ова е јасна позиција на оваа комисија.“, изјави Жозеп Борел, виш претставник на ЕУ.
Во извештајот за Северна Македонија се повторува дека меѓупартиската соработка е суштинска за исполнување на европската агенда, истовремено потенцирајќи ја и потребата од спроведување на преземената обврска за уставни измени за кои, како што се наведува, нема каков било напредок.
За некои од клучните области како што се судството и борбата против корупцијата Комисијата заклучува дека Северна Македонија се наоѓа меѓу имање некое ниво на подготвеност и умерено ниво на подготвеност. Конкретно за судството се нотира дека има ограничен напредок, иако се бара изпорачувањето на правдата да биде подобрено, додека за борбата против корупцијата оценката е дека нема напредок. Во овој дел препораките се дека мора да се донесе нов Кривичен законик во согласност со ЕУ-стандардите, како и да се подобрат резултатите во случаите на корупција на високо ниво.
За разлика од ова, комисијата гледа некаков напредок во сферата на справувањето со организираниот криминал, притоа повикувајќи на подобрување на ефектот на истрагите, обвиниенијата и пресудите поврзани со овој тип на кривични дела.
За слободата на изразувањето Брисел смета дека бил постигнат само ограничен напредок и се повикува на ланските препораки.
Во сегментот на економијата во извештајот се заклучува дека Северна Македонија направила одреден напредок и има постигнато добро ниво на подготвеност за создавање функционална пазарна економија, но затоа пак за компетитвнсота се смета дека нема каков било напредок.
Земјава добро стои во делот на надворешната и безбедносна политика и се оценува дека има добро ниво на подготвеност, притоа се повикуваат властите да останат на целосната усогласеност со европските политики.
„Функционирањето на демократските институции е претежно задоволително. Ситуацијата беше поларизирана во периодот пред изборите во април и мај 2024 година“, е оценката за изминатите двојни избори.
Извештајот што првично беше презентиран во Брисел, подоцна евроамбасадорот Михалис Рокас, во Скопје, му го врачи на државно-владиниот врв – на претседателката, спикерот и на премиерот.
Извори: Глас на Америка; Европска Комисија
