Туристичкиот сектор е вратен на нивото од 2019 година и постигнува уште подобри резултати. Тоа го покажуваат најновите податоци, за јуни и јули. Капацитетите во земјава, посебно во Охридскиот регион, се полни, престојот на странските туристи е се подолг и нивната просечна потрошувачка изнесува 85 – 95 долари. Девизниот прилив е значително зголемен и ако остане ваква состојбата, ќе ги постигнеме предвидените 530 милиони долари промет во 2023 година, рече денеска директорот на Агенцијата за промоција и поддршка на туризмот (АППТ), Љупчо Јаневски.
Како што истакна Јаневски на средба со новинарите, со ваков континуиран раст се оди кон целта за 2025 година – реализирање 3,7 милиони ноќевања и 600 милиони долари или повеќе од четири отсто во БДП.
Тој напомена дека поради политичката состојба годинава е намален бројот на бугарски туристи кои во 2019-та биле меѓу „топ 5-те“, па ќе треба да се надоместат околу 75 000 – 100 000 ноќевања. Ваквиот „минус“ ќе се амортизира со зголемениот број туристи од Хрватска, Србија, Романија, Tурција и Словенија.
Најголем пазар засега е турскиот, истакна директорот, со зголемување на бројот на туристи за 66 отсто, а потоа е српскиот со раст од 30 проценти. Но, Северна Македонија, како дестинација е атрактивна и за гостите од БиХ, Холандија, Обединетото Кралство и Полска кои од мај и јуни веќе пристигнуваат со поголем број чартер летови.
-Прв пат во првиот квартал на 2023 година туризмот во македонската економија влеал 93 милиони долари што е за 19 отсто повеќе од 2022 година или 41 процент повеќе од 2019 година. Toa не охрабрува да констатираме дека сме на вистински пат да ги зацртаме целите за 2023 година и продолжиме кон целта за 2025 година кога треба да ја надминеме најуспешната 1988 година во македонскиот туризам со над 3,7 милиони ноќевања. Позитивни резултати се забележани во Охридскиот и Скопскиот регион, во првите пет месеци за 2023 година има раст на бројот на туристи и остварени ноќевања. Во овој момент капацитетите во Охридскиот регион се полни над 90 отсто, и во приватното сместување и во хотелските комплекси, а заокружени се и букирањата до средината на октомври, истакна Јаневски.
Според него, во земјава нема намалување ниту на домашните турсти што е голем успех ако се земе предвид дека по КОВИД пандемијата повеќето граѓани сакаа да излезат надвор од државата. Јаневски очекува падот на домашните туристи годинава да не биде поголем од 5 отсто.
Анализите покажуваат дека скок на гости во првите пет месеци 2019/2023 година се бележи кај турските, романските и српските туристи, како и кај остварените ноќевања со што 2023 година ги има сите услови кумулативно да ја надмине 2019 година по бројот и на остварени ноќевања, приближувајќи се до 530 милиони долари девизен прилив.
Како што оцени Јаневски, годинава македонскиот туризам сe соочува и со намалување на бројот на албански и косовски туристи кои патуваат во други дестинации. Сепак, враќање на резултатите од 2019 година за овие и за бугарските туристи се очекува во втората половина на 2023 година.
-Оваа година треба да покаже дека отворањето нови пазари, воспоставувањето нови чартери и редовни линии, реализацијата на првиот дел на медиумската кампања од страна на АППТ веќе во првите пет месеци создадоа позитивна клима и раст на холандските, турските, романските, англиските, српските туристи надополнети со други секундарни пазари, од кои се очекува раст од 20 до 30 отсто, рече Јаневски.
Тој напомена и дека еден од предизвиците со кои допрва ќе се соочи домашниот туризам, е кинескиот пазар кој во 2024 година треба да достигне кулминација на Балканот преку т.н. регионални тури, за што земјава треба соодветно да се подготви.
Согласно последните истражувања, во домашната туристичка индустрија се вработени меѓу 30 000 и 33 000 лица зависно од сезоналноста, што е околу пет отсто од вкупниот број вработени во македонската економија.
