Дијана Тахири
Кандидатите за претседателското место на Република Северна Македонија се длабоко во вториот дел од кампањата пред финалниот ден на гласање во вториот круг. И не престануваат со меѓусебните препукувања, наместо да се концентрираат на промовирањето на своите цели и програми во нивното идно евентуално претседателствување со земјата.
„Важно е да не се гласа за Сиљановска, бидејќи таа сака да уништи се она што е направено во интерес на граѓаните. Во 2001 јас велев да за Рамковниот договор, таа беше против, јас бев за Законот за јазици таа беше против. Во недела сите кои ќе гласаат за неа, гласаат за нов Иванов. Знаете дека тој 10 години се што правеше правеше во интерес на ВМРО-ДПМНЕ и Никола Груевски. Сега, Сиљановска сака да продолжи како него, сака да го врати назад Никола Груевски кој избега во Будимпешта“, изјави Пендаровски на посетата со жителите од Липково.
Во меѓувреме, Груевски се шета по Будимпешта од време на време не удостојува со објави на неговиот Фејсбук профил. А како стигна до Будимпешта, се уште не се знае.
„Јас силно верувам дека само обединети во различностите, можеме да одиме напред, кон подобра иднина, кон НАТО и ЕУ. Токму затоа ќе бидам претседател кој поттикнува заедништво и меѓусебно разбирање. Во мојот кабинет ќе има претставници од сите етнички заедници избрани според нивната компетентност и професионалност. Кабинетот на претседателот ќе го отсликува нашето мултикултурно општество. Остро ќе се спротивставам на секоја партија која ќе се обиде да прави меѓуетнички тензии и на сите политики кои повикуваат на поделби и конфликти. Без разлика која политичка партија или коалиција е на власт отворено ќе ги критикувам политиките кои ќе го стават под знак прашање или на било кој начин ќе ги загрозат интересите на граѓаните, кои се и остануваат мојот највисок приоритет.“, вели Пендаровски во соопштение до јавноста и медиумите.
Силјановска Давкова вчера одби да одговори на повикот од иницијативата #НаМегдан, со следново образложение: „ Мојата агенда е преполна, јас ги почитувам сите, но не мислам дека се тие разочараните шарени револуционери, оние револуционери коишто сметаа дека револуцијата треба да тече, а за да бидете револуционер треба да бидете, не само на пристојно растојание, туку да бидете наспроти власта.“ Потоа, се сретна со, како што вели таа, лидерот на „Левица“ ( или тоа што остана од Левица), Димитар Апасиев. Ако веќе треба да се искоментира, средбава е само потврда на упорноста на кандидатката да се демантира и да го запечати веќе силниот впечаток дека таа не бира средства до претседателската фотеља. Во редот на нејзините подвизи во битката за победа се редат и нејзините малкубројни средби и изјави за нејзината голема посветеност и љубов кон сите граѓани немакедонци во земјава. По Албанците, на ред дојдоа и Ромите и Бошњаците. И сиромашните и децата.
Кандидатката Силјановска Давкова вчера организираше хуманитарен настан, односно, заедно со нејзиниот тим, ќе подготвуваа оброци за социјално загрозени лица и од ранливи категории. За да побара гласови и од нив. На реакциите од Министерството за труд и социјални политики, за злоупотреба на децата и младинците без родители и родителска грижа во СОС Детско село, Силјановска Давкова ги повика министерката Царовска и СДСМ да одговорат каде гледаат злоупотреба во нејзиниот хуманитарен настан.
„За разлика од СДСМ и Пендаровски, мојот тим нити вклучи нити објави настани, фотографии или видеа со деца. Штитениците на СОС Детско село и СОС мајките беа крајни корисници на настанот и нашата кампања, но директно во ниту еден момент не беа вклучени. Го повикувам СДСМ и Министерката Царовска да кажат во што се состои злоупотребата.
Дали тоа што беше донирана храна на деца без родители? Дали тоа што настанот се случи откако фондацијата дозволи храната да биде донирана или тоа што како и во многу други случаи на децата им беше искажана љубов и хуманост без воопшто да бидат објавени нивните идентитети?“, изјави Силјановска Давкова.
Ако на почетокот на кампањата кандидатите се трудеа ( иако безуспешно) да бидат забавни и интересни за граѓаните (читај -гласачите), овој дел од кампањата не само што не е забавен и интересен, туку и предизвикува одбивност за следење. Уште некој ден…
