„Протест(и)“, изложба на фотографии на Александар Кондев е инспирирана од шестгодишно протестирање документирано со над 10.000 фотографии.
„Јас сум уметнички фотограф и пред сè сакав да оставам уметнички документ… Мене ме интересираше човекот, нивните интереси, нивните пароли и борба…Со ова оставам траен документ дека ние не сме црна дупка на Балканот, туку дека сите што протестираа знаеја што сакаат-мир, демократија и слобода“, изјави Кондев за ЦИВИЛ Медиа.
Кондев наместо пасивно учество, одбира активен пристап на меморизирање на настаните одвнатре, меѓу демонстрантите. Фотографскиот циклус настанат на улица меѓу борците за правда и демократија, ќе биде изложен на отворено во паркот „Жена-Борец“, спроти Собранието, на 12 април, точно напладне.
Во разговор со ЦИВИЛ Медиа Кондев, исто така, истакна дека изложбата го опфаќа периодот од протестите за Мартин Нешковски, па сѐ до Шарената Револуција. Датумот на одржување, 12 април, се поклопува со официјалното започнување на борбата на Шарените.
Изложбата ќе има карактер на јавен перформанс, а поканети се активистите од протестите, што можат да се препознаат на фотографиите и да се потпишат на истите.
Биљана Јордановска
Камера: Дехран Муратов