Екс-градоначалниот на Аеродром, Ивица Коневски, денеска на прес-конференција застана во одбрана на својот колега, исто така, екс-градоначалник на Ѓорче Петров, Сокол Митревски, повторно обвинувајќи ја СДСМ за напад врз ВМРО-ДПМНЕ и Македонија.
„СДСМ е фатен на дело, со докази, како ги спроведува најкриминалните избори досега. Заради неспособноста на црното економско трио Заев, Анѓушев и Тевдовски, државата е на работ на економски колапс, а секојдневно гледаме како тајкуните блиски до партијата се обидуваат да преземаат компании. Затоа на СДСМ им е потребен дефокус и затоа СДСМ ги злоупотребува институциите за политички прогон со кој би ја покривал катастрофалната неспособност“, истакна Коневски.
Сега барем е јасно како ден дека сите спектакуларни апсења кои ги спроведе режимот на партијата на Коневски покрај политичка одмазда кон неистомислениците имале и друга димензија – дефокус од сите криминали кои ги направи ДПМНЕ додека беше на власт. Фала Ви господине Коневски, ова не можеше подобро да Ви го срочат!
„Почитувани денеска во 4 часот наутро е уапсен Сокол Митревски. Генералот Сокол Митревски кој беше досегашен градоначалник на Општина Ѓорче Петров ниту е криминалец, ниту сторил нешто за полицијата да се изживува со него и неговото семејство на ваков начин“, продолжува Коневски.
Чекајте… застанете малку! А спектакуларното апсење на Бошковски? А семејството на Кежаровски? Зошто молчевте кога тоа го правеше вашата партија господине Коневски? Велите: „ова е само продолжување притисокот кој го врши СДС и понижување на Македонија и сѐшто е македонско, и тоа преку државните институции кои се користат како средство за пресметка со политички неистомисленици“. Не ли го правевте вие токму тоа? Или пак, според некои ваши пресметки Бошковски и Кежаровски се помалку Македонци и помалку луѓе?
Денеска, е уапсен Сокол Митревски, поранешен градоначалник на општина Ѓорче Петров осомничен за незаконска пренамена на земјиште на територијата на општината и за незаконско давање под концесија на земјиште. Тоа е сѐ! Што требаше? Да земат да го сместат во нова фотелја и да му врачат награда? Не ве разбирам!
До пладне медиумите шпекулираа и чекаа Јавното обвинителство да излезе со соопштение и да ја потврди информацијата за апсењето на Митревски. На ниту еден медиум не видовме снимка од спектакуларно апсење со конвој специјалци како што беше случајот со Кежаровски.
„Овој напад не е само врз Сокол, овој напад е врз ВМРО и Македонија“, тврдите господине Коневски. Не! Ова е само еден од низата случаи коишто мора да се решат час поскоро! Ова се нарекува почеток на падот, не на ВМРО (барем не на она вистинското, кое треба да остане таму каде што е и да ви се одземе правото да го злоупотребувате како име), туку пад на вашата криминална банда која ја уништи Македонија. Онаа Македонија за која тврдите дека е нападната!
Престанете со ширење на хистерија и соочете се со фактот дека правдата во оваа држава доаѓа! Полека, но сигурно доаѓа и никој не смее да биде поштеден!
Маја Ивановска
