Актуелниот градоначалник на Струмица Костадин Костадинов ја замрзнува партиската припадност во СДСМ и најавува креирање на ново интерпартиско делување кое ќе биде презентирано по завршување на локалните избори.
– Мојата стратешко политичка одлука за делување во СДСМ или можеби надвор од СДСМ ќе биде јавно кажана во два дела. Првата ќе биде септември, конечната по завршување на овие локални избори. До тогаш посакувам среќа да се победи во барем една општина, напиша вечерва Костадинов на Фејсбук откако лидерот на СДСМ Венко Филипче на прес-конференција соопшти дека кандидат за градоначалник на Струмица на претстојните локални избори ќе биде Маријан Даскаловски.
Во објавата Костадинов вели дека неговата партиска припадност од денес е замрзната во СДСМ, се додека СДСМ не се врати таму каде што и е местото.
– Во следните месеци, ќе започнам со креирање на ново интерпартиско делување, кое ќе биде презентирано по завршувањето на локалните избори. Целосно прецизна стратегија, доволно мотивирачка за да обедини авторитети што ѝ недостигаат на СДСМ, тешки за да бидат непривлечни за политичките авантуристи, и доволно забавни за да се пронајдат младите. Нов тек. Нова целост. Ова не е адут за кампања. Ова е должност кон идејата во која верувам, напиша Костадинов.
Додава дека останува социјадемократ и дека Струмица ќе продолжи да победува дури и без него како кандидат.
– Во сегашната политичка слика, мојата кандидатура – од било која партија – е бесмислена. Не затоа што се плашам од пораз, јас не знам што значи да изгубиш избори, туку затоа што нема вистинска понуда за градот. Нема суштинска дебата, нема нова визија, нема предизвик. А човек што нема предизвик – ќе победи, но ќе тапка во место. А тоа е пораз што не го прифаќам. Паметно е да направиш чекор назад кога немаш конкуренција, за да ја видиш планината од дрвото кое што сега ти ја крие, вели Костадинов во објавата.
Претходно, лидерот на СДСМ на прес-конференција на која обелодени имиња на дел од кандидатите за градоначалници на претстојните избори, рече дека очекува од Костадинов да се стави на располагање на партијата исто како што партијата била тука за него во изминатиот период, пренесе МИА.
Костадинов пред една недела му упати клетва и закана за одмазда на новинарот Драган Павловиќ Латас, бидејќи на еден потксат го споменал името на неговиот починат татко во негативна конотација како коцкар.
