Претседателот на СДСМ, Димитар Ковачевски смета дека е изводливо до 2030 година земјата да стане полноправна членка на ЕУ. Тој од трибината „Силно и одлучно кон иднината“ од Велес кажа дека политичките фактори треба да го разберат значењето и да се здружат силите за целосно да се изоди европскиот пат.
Можеме да ставиме крај на хипотеките наметнати од минатото, од политичари кои личниот интерес им бил пред судбината и иднината на граѓаните и да зачекориме храбро кон европската иднина, кажа Ковачевски.
Претседателот на СДСМ истакна дека на нашиот европски пат постои сериозна закана.
Најзабележителен и најопасен во моментов е Димитар Апасиев. Тој е агент на хаосот. Тој верува дека колку повеќе е лошо за земјата – толку е подобро за него. Неговата цел е да запали оган за луѓето да се стоплат и да заборават дека горат нивните чевли. Еве каде многу луѓе грешат, и тука е токму опасноста. Економската криза и фрустрацијата ги очајуваат луѓето и ги тера да размислуваат да му дадат шанса. Во руралните средини, меѓу младите, дури и меѓу средната класа кои се борат под кризата на трошоците за живот. Не се лажете – тој станува посилен, додаде Ковачевски.
Според него, причината што Апасиев е посилен е дека Мицкоски е послаб.
Мицкоски секое утро кога отвора очи прво што прави – проверува во телефонот што кажал претходната вечер Апасиев, па водејќи се од тоа во Белата палата под судска заплена, дава наредби каква ќе биде нивната комуникација тој ден. Да не е случајно ВМРО-ДПМНЕ помалку екстремна од Левица за да не им пребега некој член во партијата на Апасиев. Затоа Мицкоски еден ден вика дека ја поддржува ЕУ, а веќе следниот ден во Собранието ја блокира сета законска регулатива што се однесува на Европската Унија. Човек без визија заедно со пироман со визија за хаос. Додадете го во мешавината Груевски, кој под неговото 11-годишно владеење, земјата беше блокирана во Европа – и тука е совршената бура. Резулатот од тоа може да биде закочена интеграцијата во ЕУ, заклучи Ковачевски.
Претседателот на СДСМ, меѓу другото, додаде дека власта докажала оти е возможно во ек на најголема криза да се инвестира во патната инфраструктура и поврзување на нашата земја со европските земји. Новите патни делници и оние на кои активно се работи тој ги припиша на неговиот економски план за напредок.
Наредната година ќе биде подобра и тоа ќе го докажам! Оние од ВМРО-ДПМНЕ што велат дека нема да успееме се истите оние кои 11 години ја заглавија земјава а денеска ги заглавија општините кои ги предводат. Погледнете што се случува во Велес, погледнете што се случува во Скопје. Наместо да се развиваат, општините под водство на ВМРО-ДПМНЕ стагнираат, нема нови проекти, нема ништо. Главниот град е нефункционален, на раб на колапс. Наместо нов градски превоз, нема превоз, наместо нови еколошки автобуси и тие што ги има не возат, рече Ковачевски.
Според него, ваква катастрофа на главниот град му се случува само поради неспособноста на ВМРО-ДПМНЕ и нивните раце во медот.
И го слушам Мицкоски вели немал намера да им се извини на граѓаните за хаосот во Скопје. Касно ти е Мицкоски веќе за извинување увидоа граѓаните, ја гледаат и вашата неспособност и катастрофата што ја создадовте. Проблемите кои ВМРО-ДПМНЕ ги остава ние од СДСМ ќе треба да ги решаваме, за граѓаните, не за политика, истакна претседателот на СДСМ.