Денеска во Скопје се одржа прес конференција на претседателот на Владата Зоран Заев заедно со Aмбасадорката на Сојузна Република Германија во земјава, Анкe Холштајн, за потпишување на договор за грант наменет во обновливи извори за енергетска транзиција.
Потпишувањето на договорот значи користење на неповратни средства од германската влада во износ од 2,4 милиони евра, кои ни ставаат на располагање дополнителни 80,5 милиони евра како евтини кредити за изградба на енергетски објекти.
Договорот го потпишаа генералниот директор на ЕСМ, Васко Ковачевски и директорот на KfW за Северна Македонија и Косово, Рене Ешеманн.
На прашањата на ЦИВИЛ за тоа која е временската рамка и дали постојат општини односно региони во кои ќе се инвестира во енергетската транзиција и како и на кој начин ќе се обезбеди транспарентност во постапките, генералниот директор на ЕСМ, Васко Ковачевски одговори :
„Временската рамка е согласно планот и стратегијата на владата на Република Северна Македонија и сценариото кое што е општо прифатливо за наредниот период. Како што напоменав во нашите изјави, ова се наменски средства за проекти за физибилити студии и проекти за животна средина коишто ги имаме во Битола, во Миравци-Гевгелија, во Скопје и хидро централите коишто се на повеќе локации. Тоа значи дека ние во наредниот период, во следните 4-5 години треба да ги завршиме сите проекти, и да се отпочнат и да бидат во фаза на реализација сите проекти кои значат обновливи извори на енергија, односно замена на постоечките производни капацитети од јаглен кон обновливи извори на енергија.“
Ирена Крџиќ
монтажа: Ариан Мехмети
