Двочасовната церемонија на крунисување на новиот британски крал Чарлс Трети заврши нешто по 13 часот по локално време, а поворката ја напушти Вестминстерската палата и се упати назад кон Бакингемската палата, објави Си Ен Ен.
Чарлс Трети положи заклетва за крунисување потврдувајќи дека ќе го почитува законот и Англиската црква за време на неговото владеење и потврди дека е „верен протестант“.
Десетина минути по него, беше крунисана и кралицата Камила (75), втората сопруга на Чарлс, на која новиот британски крал и е и втор брачен партнер.
Додека крунисаната двојка ја напушташе палатата, се свиреше националната химна, а потоа поворката се упати кон Бакингемската палата по истата машрута по која се движеше до опатијата, но во старата Златна државна кочија.
Изработена е во 1762 година и се користи на сите крунисувања од 1831 година. Елизабета се пожали на неудобноста на кочијата по нејзиното крунисување, опишувајќи го искуството како „ужасно“.
Во моментот на ставање на круната на Свети Едвард на главата на Чарлс, настанот беше одбележан со истрели од огнено оружје кои беа испукани низ Обединетото Кралство.
Кралот беше крунисан пред околу 2.000 луѓе, од странски лидери и членови на кралското семејство до избрани функционери и претставници на граѓанското општество.
Меѓу гостите беше и претседателот Стево Пендаровски, придружуван од сопругата Елизабета Ѓоргиевска.
Претседателот и сопругата присуствуваа на настаните во Лондон како одговор на поканата упатена до шефови на држави од британската страна. Македонско-британските релации се темелат на заеднички и универзални вредности и постојано се унапредуваат уште од нашата независност. Во 2023 година Република Северна Македонија и Обединетото Кралство одбележуваат јубилеј од три децении од воспоставувањето на дипломатските односи, се наведува во соопштението од кабинетот на Пендаровски.
Двочасовната церемонија во Лондон беше предводена од надбискупот од Кентербери, Џастин Велби.
Г. Т.
