пишува: БИЉАНА ЈОРДАНОВСКА
Деновиве, на Курир излезе ексклузивна вест дека Уверението за државјанство, со новиот изглед и промените, го негира македонскиот идентитет. Оваа веб страница, инаку со години позната по честите, речиси секојдневни „излети“ во светот на лажните вести и дезинформации, често се надминува и самата себе си.
Овојпат, се работи за тврдење на Курир дека: „Карактеристично во новото уверение е тоа што не постои македонско државјанство…“ и тоа веднаш под фотографијата од новиот дизајн на овој документ. И, се разбира, како во насловот, така и во текстот, за сѐ е виновен Зоран Заев, небаре тој седнал и го дизајнирал овој документ.
Повеќе од очигледно е дека во Уверението што самите „курири“ го приложуваат како „доказ“ со големи, црни букви, под празното место за име на државјан(к)ите, пишува: ИМА ДРЖАВЈАНСТВО МАКЕДОНСКО!
Според Договорот од Преспа, уставните измени и според Законот за употреба на јазиците, Уверението ги исполнува условите, но најочигледен е токму изразот ДРЖАВЈАНСТВО МАКЕДОНСКО, за кој во текстот на Курир се тврди дека е бришење на македонскиот идентитет.
Со што оваа вест е „ексклузивна“ и на кој начин Заев со овој документ го брише македонскиот идентитет, навистина е нејасно. Напротив, очигледно е дека се игра на картата на лажниот патриотизам и форсирање на национализам преку груба пропаганда и играње со чувствата на граѓаните.
„Веројатно, теоретичарите треба да измислат нов назив за ова што го прават „куририте“ во медиумите. Каде тука се урива македонскиот идентитет и како тоа не постои македонско државјанство, навистина не можам да разберам. Се разбира, тие го засилуваат својот напад и со аргументот дека документот е двојазичен и дека јазиците се рамноправни. Тоа воопшто не мора да се коментира понатаму. Со тоа само се дозакопуваат во дупката што самите си ја ископаа“, коментира Џабир Дерала, ЦИВИЛ, во еден од своите рафали.
Оваа „ексклузивка“ на Курир секако може да послужи како добра илустрација до каде може да се оди со негирање на очигледното. Навистина претерано!
